शहादा महाविद्यालयात ‘वाचन प्रेरणा : ग्रंथ परिचय’ उपक्रम

सातपुड्याच्या पायथ्याशी आदिवासी परिसरात किसान, मजूर, दलित, ग्रामीण युवक-युवतींचा उत्कर्ष व्हावा या ध्येयाने स्व.पी.के. अण्णा पाटील यांनी १९७० साली म्हणजे ५० वर्षांपूर्वी पूज्य साने गुरुजी विद्या प्रसारक मंडळाच्या कला, विज्ञान व वाणिज्य महाविद्यालयाची स्थापना केली. महाविद्यालयाच्या सुवर्ण महोत्सवी वर्षानिमित्त ‘वाचन प्रेरणा : ग्रंथ परिचय’ उपक्रम राबिवण्यात आला. या उपक्रमांतर्गत महाविद्यालयातील प्रत्येक प्राध्यापकाने ग्रंथालयातून एक पुस्तक वाचनास घ्यावे व त्या पुस्तकाचा अभ्यास करून त्यावर परिचयात्मक, समीक्षात्मक वक्तव्य द्यावे. अशा स्वरूपाचा हा उपक्रम सलग एक महिना दररोज दोन तास याप्रमाणे राबविण्यात आला. कादंबरी, नाटक, आत्मचरित्र, कथासंग्रह, काव्यसंग्रह अशा विविध प्रकारांचे ग्रंथ वाचन करून त्यांचा परिचय प्राध्यापकांनी सादर केला. या सादरीकरणाचे ग्रंथ रूपात प्रकाशन संस्थेच्या सुवर्ण महोत्सवाच्या निमित्ताने करण्यात येणार आहे, अशी माहिती प्राध्यापक प्रबोधिनीचे संयोजक डॉ.विजयप्रकाश शर्मा यांनी दिली.

पूर्ण महिनाभर झालेल्या या उपक्रमात समन्वयक प्राचार्य मकरंद पाटील, प्राचार्य डॉ.आर.एस. पाटील, उपप्राचार्य डॉ.एम.के. पटेल व डॉ.एस.डी. सिंदखेडकर, कनिष्ठ महाविद्यालयाच्या प्राचार्य इंदिरा पटेल, पर्यवेक्षक प्रा. कल्पना पटेल, मंडळाच्या सर्व महाविद्यालयांचे प्राचार्य, विभाग प्रमुख, प्राध्यापकांनी उपस्थिती दिली. प्राध्यापक प्रबोधिनीचे संयोजक डॉ. विजयप्रकाश शर्मा, सचिव प्रा.वजीह अशहर, प्रा.एस.एस. पवार, प्रा.मधुकर ठाकरे, प्रा.मनोज चौधरी यांनी या उपक्रमासाठी परिश्रम घेतले. कोरोना काळात विधायक शैक्षणिक व सांस्कृतिक उपयोग करीत शासनाचे सर्व नियम पाळून राबविलेल्या या उपक्रमाबद्दल कवयित्री बहिणाबाई चौधरी उत्तर महाराष्ट्र विद्यापीठाचे कुलगुरू डॉ.पी.पी. पाटील, प्र-कुलगुरू पी.पी. माहुलीकर, व्यवस्थापन परिषद सदस्य डी.आर. पाटील, मंडळाचे अध्यक्ष दीपक पाटील, उपाध्यक्ष जगदीश पाटील, मानद सचिव कमलताई पाटील, समन्वयक पी.आर. पाटील यांनी कौतुक केले.