मंदाणे येथे कोरोना पुन्हा दाखल

पॉझिटिव्ह रुग्णांवर जिल्हा रुग्णालयात उपचार सुरू आहेत. गेल्यावर्षी सप्टेंबर-ऑक्टोबर २०२० पासून गायब झालेल्या आजाराने पुन्हा डोके वर काढल्याने नागरिकांमध्ये भीती पसरली आहे. गावात कोणत्याही प्रकारची खबरदारी घेतली जात नसल्याने आणि कोणाकडूनही कोणत्याही प्रकारचे शासकीय आदेशाचे पालन होत नसल्याने तसेच तोंडाला मास्क लावून फिरणे आणि सामाजिक अंतर ठेवणे, गर्दीच्या ठिकाणी न जाणे याकडे कोणाचेही लक्ष नसल्याने बधितांची संख्या वाढत चालली आहे. यावर प्रशासनाने आवश्यक उपाययोजना करणे गरजेचे झाले आहे. नाही तर मागील वर्षासारखी भीषण परिस्थिती निर्माण होण्याची शक्यता नाकारता येणार नाही.

मंदाणे येथे ९ मार्च रोजी एकाच घरात तीन रुग्ण आढळून आले. त्यापैकी एका बधिताचा मृत्यू झाल्याची घटना घडली. १० मार्च रोजी पुन्हा एका व्यक्तीचा अहवाल पॉझिटिव्ह आला. या तिघा पॉझिटिव्ह रुग्णांवर जिल्हा रुग्णालयात उपचार सुरू आहेत. यामुळे गावात भीतीचे वातावरण निर्माण झाले आहे. गावातील त्या रुग्णांच्या घराला ग्रामपंचायत व आरोग्य विभागाकडून सॅनिटायझर करण्यात आले. तसेच प्राथमिक आरोग्य केंद्राकडून भेट देऊन आजूबाजूला कोणालाही आरोग्याबाबत काही त्रास झाल्यास तात्काळ संपर्क करण्याचे आवाहन करण्यात आले आहे. मंदाणे गाव हे जवळपास ४० खेड्यांचे मध्यवर्ती ठिकाण आहे. यामुळे याठिकाणी बाजार करण्यासाठी बाहेरून येणाऱ्या नागरिकांची संख्या मोठ्या प्रमाणावर आहे. जिल्हा प्रशासनाने केलेल्या कोणत्याही आदेशाचे पालन गावात करण्यात येत नाही. कोणत्याही नागरिकांच्या तोंडावर मास्क आढळत नाही किंवा कोणत्याही दुकानावर व इतर ठिकाणी सार्वजनिक कार्यक्रमात सामाजिक अंतर ठेवले जात नाही. गावात सगळीकडे मोकळेपणाने वावर असल्याने मागील वर्षासारखी परिस्थिती तर ओढवणार नाही ना? अशी भीती नागरिकांमध्ये पसरली आहे. गावात बाधितांची संख्या वाढू नये, यासाठी प्रशासनाने गांभीर्याने लक्ष देऊन उपाययोजना करणे गरजेचे आहे.