रेमडीसीवर इंजेक्शन खरेदीसाठी शहाद्यात रांगा

नंदुरबार व धुळे जिल्हा कोरोना विषाणू संक्रमणाचा विस्फोट झाल्याने दिवसेंदिवस बाधितांची संख्या कमालीची वाढत आहे. बाधित रुग्णांना उपचारासाठी पहिल्या दिवशी रेमडीसीवर इंजेक्शनचा डोस द्यावा लागतो. त्यानंतर किमान सहा इंजेक्शनचा कोर्स पूर्ण करावा लागतो. यामुळे या इंजेक्‍शनची मोठ्या प्रमाणात मागणी आहे. मात्र इंजेक्शनचा तुटवडा असल्याने गरजूंना उपचारासाठी चढ्या भावाने खरेदी करावी लागल्याच्या घटना घडलेल्या आहेत. काही विक्रेत्यांकडून चक्क दोन ते चार हजार रुपये या दराने या इंजेक्शनची विक्री झालेली आहे. एकीकडे या इंजेक्शनचा काळाबाजार रोखण्यासाठी प्रशासनाला अपयश आलेले आहे तर दुसरीकडे त्याचा सुरळीत पुरवठा करण्यासाठी प्रशासनाने कुठलीही उपाययोजना केलेली नसल्याने गरजूंना ते काळाबाजारातच खरेदी करावे लागत आहे.

या पार्श्वभूमीवर आमदार अमरिशभाई पटेल यांच्या माध्यमातून सातपुडा साखर कारखान्याचे चेअरमन दीपक पाटील यांनी माजी उपनगराध्यक्ष दीपक पटेल यांच्या सहकार्याने पी.के. अण्णा फाउंडेशनच्या माध्यमातून तसेच आमदार राजेश पाडवी यांनी ‘ना नफा ना तोटा’ या धर्तीवर शनिवारपासून शहाद्यात हे इंजेक्शन अवघ्या ७७७ रुपयाला उपलब्ध करून दिले आहे. अगदी स्वस्तात व सहजरित्या हे इंजेक्शन मिळत असल्याने शनिवारपासून त्याच्या खरेदीसाठी बाधितांच्या नातेवाईकांनी मोठी गर्दी केली होती. पहिल्या दिवशी एक हजार व्हायल विक्री झाल्या तर दुसर्‍या दिवशी रविवारी सकाळपासूनच धुळे व नंदुरबार जिल्ह्यातील नागरिकांनी विक्रमी गर्दी केली होती.

अहमदाबाद येथील कॅडीला या औषध कंपनीमधून या इंजेक्शनची खरेदी करण्यात येत असून त्यासाठी शासकीय नियमांची पूर्तता करण्यात आली आहे. सर्वसामान्य जनतेला हे इंजेक्शन सहजरीत्या उपलब्ध व्हावे यासाठी पी.के. अण्णा फाउंडेशनने हा उपक्रम राबविला आहे. पुढील काही दिवस नियमित राबविला जाईल. याचा फायदा कोरोना बाधित रुग्णांना उपचारासाठी होणार असून हे इंजेक्शन फक्त गरजूंनी खरेदी करावे. या इंजेक्शनचा होत असलेला काळाबाजार रोखण्यासाठी तसेच नागरिकांना आर्थिक भुर्दंडापासून वाचविण्यासाठी हा उपक्रम राबविला असल्याची माहिती फाऊंडेशनचे सचिव प्रा.मकरंद पाटील यांनी दिली.

दरम्यान, गेल्या दोन दिवसापासून रेमडीसिवर या इंजेक्शनची विक्रमी विक्री झाली आहे. शुक्रवारपर्यंत या इंजेक्शनचा मोठ्या प्रमाणात तुटवडा असल्याने यासाठी मोठ्या प्रमाणात नागरिकांना पैसा खर्च करावा लागला. आता सहजरित्या हे इंजेक्शन उपलब्ध होत असल्याने तालुक्यात खरोखरच कोरोना संक्रमणाची परिस्थिती भयावह झाल्याचे चित्र स्पष्ट होत आहे. शासनाने कोविड सेंटरसह इतर औषध विक्रेत्यांकडे व स्वयंसेवी संस्थांकडे ७७७ रुपयात अथवा त्यापेक्षा कमी किमतीत हे इंजेक्शन उपलब्ध करून द्यावे व नागरिकांची वणवण भटकंती थांबविण्यासह त्यांचे आर्थिक नुकसान टाळावे यासाठी युद्धपातळीवर प्रयत्न करावे, अशी मागणी जोर धरत आहे.