बसस्थानक परिसरात देह विक्री व्यवसाय पुन्हा सुरू, पोलिसांचे दुर्लक्ष

नंदुरबार : शहरातील बसस्थानक परिसरात देह विक्री व्यवसाय पुन्हा सुरू झाला आहे. यामुळे नागरिकांमध्ये नाराजीची भावना असून पोलिसांनी याकडे दुर्लक्ष केले आहे. गेल्या तीन ते चार वर्षांपासून येथील व्यवसायाला आळा बसला होता. आता तो कुणाच्या आशीर्वादाने सुरू झाला आहे याबाबत चर्चा सुरू आहे.

शहरातील जुनी दूध डेअरी परिसरात पूर्वी देह विक्रीचा व्यवसाय मोठ्या प्रमाणावर चालत होता. नागरिकांच्या वाढत्या तक्रारी आणि नवीन बसस्थानक या परिसरात आल्याने व्यवसाय बंद करण्याच्या मागणीने जोर धरला होता. त्यामुळे तत्कालीन अपर पोलीस अधीक्षक अनिता पाटील यांनी थेट कारवाई करीत हा व्यवसाय बंद केला होता. तीन ते चार वर्ष हा व्यवसाय बंद राहिल्यानंतर आता तो पुन्हा सुरू झाला आहे. त्यामुळे शहरवासीयांमध्ये नाराजीची भावना आहे.

या परिसरात नवीन बसस्थानक आल्याने प्रवाशांची मोठी गर्दी असते. याच ठिकाणी महायोद्धा वीर राणाप्रताप यांचा अश्वारूढ पुतळा आहे. शाळेत, महाविद्यालयात जाणारे विद्यार्थी बसस्थानकातून उतरल्यावर याच रस्त्याने जातात व येतात. बाजार समितीत येणाऱ्या शेतकऱ्यांची देखील मोठ्या प्रमाणावर वर्दळ असते. आता शॅापिंग कॉम्पलेक्स झाल्याने ग्राहकांचीही येथे वर्दळ असते. शिवाय बाजूलाच एस.टी.कर्मचारी यांचे निवासस्थान देखील आहे. अशा गजबजलेल्या भागात देह विक्रीचा व्यवसाय पुन्हा सुरू झाल्याने आश्चर्य व्यक्त केले जात आहे. या व्यवसायामुळे या भागात इतरही अवैध व्यवसाय सुरू झाले आहेत.

शहरात आधीच सट्टा, मटका, जुगार जोरावर आहे. कर्तव्यदक्ष पोलीस अधीक्षक महेंद्र पंडित यांनी सुरुवातीला जिल्ह्यातील अवैध व्यवसायावर जरब बसविली होती. आता मात्र नंदुरबार शहरात ते खुलेआम सुरू आहेत. त्यातच देह विक्रीचाही व्यवसाय सुरू झाल्याने शहरवासीयांमध्ये कमालीची नाराजी पसरली आहे. शहर पोलीस ठाण्याचे अधिकारी व कर्मचाऱ्यांनी याकडे सोयीस्कर दुर्लक्ष केल्याचाही आरोप होत आहे.