टरबूज विक्रीतून साधला नफा

या प्रकल्पांतर्गत प्रात्यक्षिकामध्ये प्रत्येकवर्षी वेगवेगळे प्रयोग होत असतात. यामध्ये बदलत्या हवामानामध्ये शेतकऱ्यांना उत्पन्न मिळवणे वरचेवर जिकिरीचे होत आहे. या बदलत्या हवामानाचा जोखीमस्तर कमी करून उत्पन्न मिळविणे हे आगामी कालखंडात महत्त्वाचे आहे. याचाच भाग म्हणून उमराणी, भूजगाव, धनाजे, सूर्यफुल, शिवनीपाडा येथे (निक्रा) या प्रकल्पा अंतर्गत वेगवेगळे प्रयोग होत असतात.

या उन्हाळी हंगामामध्ये टरबूज लागवडीचा प्रयोग भूजगाव, ता. धडगाव येथील रमेश जिऱ्या पावरा यांच्याकडे घेतला. यामध्ये त्यांनी कृषी विज्ञान केंद्राच्या मार्गदर्शनाने दीड एकर क्षेत्रावर टरबूज या पिकाची लागवड केली आहे. टरबूज पिकासाठी वाणाची निवड, कीड व्यवस्थापन, खत व्यवस्थापन व पाणी व्यवस्थापन या विषयी ते सतत कृषी विज्ञान केंद्राशी संपर्कात होते. यामध्ये त्यांनी पिवळे-निळे चिकट सापळ्यांचा वापर केला, सूक्ष्म अन्नद्रव्यांमध्ये त्यांनी बोरॉन १२:६१:०० तसेच १९:१९:१९ यांचा संतुलित वापर, विविध प्रकारचे पाण्यासाठी ठिबक सिंचनाचा वापर, मल्चिंगचा वापर, फळमाशी इ. तंत्रज्ञानामुळे फळांची वाढ चांगली झाली व अपेक्षित उत्पन्न त्यांना मिळत आहे. परंतु कोविड परिस्थितीमुळे विक्रीची समस्या निर्माण झाली. त्यातून सुद्धा त्यांनी मार्ग काढला रस्त्याच्या बाजूस त्यांनी फळविक्रीचा स्टॉल लावला व विक्रीसाठी त्यांनी सोशल मीडियाचा वापर केला. याचा फायदा त्यांना झाला.

एकंदरीत कृषी विज्ञान केंद्राच्या निक्रा प्रकल्पामुळे टरबूज या पिकांतून त्यांना आर्थिक नफा मिळतो आहे. याचे अनुकरण करून गावातील वसंत पावरा, सुकलाल पावरा तसेच गणपत पावरा हे शेतकरी सुद्धा टरबूज विक्रीतून नफा मिळवत आहेत.