प्रकाशा गावाची पुन्हा कोरोनामुक्तीकडे वाटचाल, १५ जूननंतर एकही रुग्ण नाही

सविस्तर वृत्त असे की, प्रकाशा हे सुमारे १५ हजार लोकवस्तीचे गाव आहे. २२ मार्च २०२० पासून कोरोना ने शिरकाव केल्यानंतर सुरुवातीचे सहा महिने एकही कोरोना रुग्ण आढळून आलेला नव्हता. मात्र ९ सप्टेंबर २०२० रोजी गावात पहिला रुग्ण आढळला. त्यानंतर मात्र गावात रुग्णांची वाढ झाली होती. त्यामुळे प्रकाशा ग्रामपंचायत, महसूल, आरोग्य, शिक्षण विभाग, पोलीस यंत्रणा या सर्वांनीच कंबर कसली होती. विविध उपक्रम, वेळोवेळी गावात फवारणी, विलगीकरण कक्षाची निर्मिती, घरोघरी जाऊन रुग्ण तपासणी, गरज वाटल्यास लॉकडाऊन आदींमुळे गावात कोरोना रुग्णांची संख्या घटली होती. गेल्यावर्षी २०२० मध्ये येथे १०९ जणांना कोरोनाची लागण झाली होती. तर दोन जणांचा मृत्यू झाला होता. १ जानेवारी २०२१ पासून ९ जूनपर्यंत प्रकाशा गावात कोरोनाचे ५२ रुग्ण आढळून आले होते. पैकी मे महिन्यात एकही कोरोना रुग्ण आढळून आला नाही. १ जून ते १४ जूनपर्यंत सहा रुग्ण आढळून आले होते. त्यानंतर १५ जून ते आजपर्यंत म्हणजे ९ जुलैपर्यंत एकही रुग्ण आढळून आलेला नाही. त्यामुळे गेल्या महिनाभरापासून प्रकाशा गावात एकही रुग्ण न आढळल्याने गाव कोरोनामुक्तीकडे वाटचाल करीत असल्याने ग्रामस्थांमध्ये समाधान व्यक्त होत आहे.

दरम्यान, ज्या गावात रुग्णसंख्या व कोरोनाची स्थिती आटोक्यात आहे अशा ठिकाणी शाळा सुरू करण्याबाबत शिक्षण विभाग विचाराधीन आहे. प्रकाशा गावात महिनाभरापासून एकही रुग्ण नाही म्हणून येथे आठवीच्या पुढील वर्ग सुरू करण्याची मागणी पालकांकडून होत आहे.

लस घेणाऱ्यांची संख्या वाढली

प्रकाशा येथे कोरोना लस घेणार्‍यांची संख्या दिवसेंदिवस वाढत आहे. दररोज येणारे लसीचे २५० डोसदेखील कमी पडत आहेत. सुरुवातीला ग्रामस्थांनी कोरोनाची लस घ्यावी यासाठी शिक्षकांनी घरोघरी जाऊन जनजागृती केली. आरोग्य विभागानेही ठिकठिकाणी शिबिरे घेतली. तसेच लस घेतल्यानंतर चांगला परिणाम समोर आल्यानंतर लोक आता स्वतःहून लस घेण्यासाठी दवाखान्यात गर्दी करीत आहेत. १८ वर्षांवरील वयोगटांतील सर्वांनाच लस देणे सुरू झाल्यामुळे आता दवाखान्यात गर्दी होऊ लागली आहे. प्रकाशा प्राथमिक आरोग्य केंद्रांतर्गत ४५ वर्षावरील आतापर्यंत तीन हजार ८३६, तर १८ वर्षांवरील एक हजार २६ जणांनी लस घेतली आहे.