प्रकाशा तीर्थक्षेत्र सुने सुनेच...

सविस्तर वृत्त असे की, २३ मार्च २०२० रोजी कोरोनामुळे लॉकडाऊन जाहीर झाल्यानंतर प्रकाशा येथील धार्मिक मंदिरे व धार्मिक उत्सवांना बंदीचा ठराव ग्रामपंचायतीने केला होता. त्यानंतर गावातील केदारेश्वर, काशी विश्वेश्वर, पुष्पदंतेश्वर, संगमेश्वर, गौतमेश्वर, मुक्तेश्वर आदींसह सर्वच मंदिराचे द्वार बंद झाले. इतिहासात आजपर्यंत ही मंदिरे कधीच बंद झाली नव्हती. मात्र कोरोनामुळे व शासनाच्या आदेशान्वये सर्वच मंदिरे बंद झाली होती. त्यानंतर मात्र कोरोना वाढतच गेल्याने ही स्थिती पुढे काही दिवस कायम राहिली.

९ जून रोजी शिथिलता मिळाल्यानंतर मंदिरावर स्वयंचलित सॅनिटायझर मशीन बसविल्यानंतर तुरळक भाविक दर्शनासाठी येऊ लागले. मात्र इतर गावात कोरोना रुग्णांची संख्या वाढल्याने गावात रेड झोनमधून येणाऱ्या वाळू वाहतूक करणाऱ्या वाहनांनाही जून महिन्यामध्ये बंदी करण्यात आली होती. विशेष म्हणजे जुलै महिन्यात श्रावण मास होता. २२ जुलैपासून हिंदू धर्मीयांचा पवित्र महिना म्हणजे श्रावण मास सुरू झाला होता. श्रावण महिन्यात पूजा-अर्चा अभिषेक आदींसाठी महाराष्ट्रासह गुजरात व मध्य प्रदेशातून भाविक केदारेश्वरसह इतर मंदिरांवर येतात. मात्र गेल्यावर्षी कोरोनामुळे श्रावण महिन्यात शांतता राहिली. एकही भाविक त्याठिकाणी आढळून आला नाही. शिवाय शाळाही बंद असल्याने विद्यार्थीदेखील घरीच दूरचित्रवाहिनीवर टीली-मिली हा कार्यक्रम पाहून अभ्यास करीत होते.

२७ जुलै रोजी प्रकाशा ग्रामपंचायतीने २९ जुलै रोजी दशामाता मूूर्ती विसर्जनासाठी परिसरातील भाविकांनी येऊ नये, असा ठराव केला करुन २८ जुलैला रात्रीपासून २९ जुलैच्या सकाळपर्यंत पोलिसांचा चोख बंदोबस्त प्रकाशा येथील तापी घाटावर ठेवला होता. दशामाता मूर्ती विसर्जनासाठी प्रकाशा तापी घाटावर यात्रा भरते. रात्रीचे नऊ तर पहाटे चार वाजेपर्यंत हजारो भाविक दशामाता मूर्ती विसर्जनासाठी येतात. मात्र गाव लॉकडाऊन होते म्हणून भाविकही येथे मूर्ती विसर्जनासाठी आले नाहीत.