शहादा तालुक्यात साडेसात एकरात अफूची शेती

उपविभागीय पोलीस अधीक्षक श्रीकांत घुमरे यांना सातपुडा पर्वताच्या पायथ्याशी असलेल्या अतिदुर्गम भागात काही शेतकऱ्यांकडून अफूची शेती करण्यात येत असल्याची गुप्त माहिती मिळाल्यानंतर आज रविवारी दुपारी चार वाजेच्या सुमारास शहादा पोलीस ठाण्याचे निरीक्षक दीपक बुधवंत म्हसावद पोलीस ठाण्याचे सहाय्यक निरीक्षक किरण पवार व सुमारे वीस अधिकारी कर्मचाऱ्यांनी तालुक्यातील म्हसावद शिवारातील शिरुड तह या गावाला सापळा रचून धाड टाकली. शिरुड तह हे गाव म्हसावदपासून आठ किलोमीटर तर फतेपूर व चिखली या गावापासून सुमारे तीन किलोमीटर अंतरावर आहे अतिदुर्गम भागात असल्याने स्थानिक शेतकऱ्यांना हाताशी घेऊन सुमारे साडेसात एकरात अफूची शेती करण्यात येत असल्याचा प्रकार पोलिसांनी उघडकीस आणला आहे या संपूर्ण साडेसात एकरात आजूबाजूला मकई तर आतमध्ये पूर्ण तयार झालेले अफूचे पीक आढळून आल्यावर धाड टाकणारे पोलीस अधिकारी व कर्मचारी आश्चर्यचकित झाले प्रशासनाचा डोळा चुकवून एवढ्या मोठ्या प्रमाणात अफूची शेती करण्यात येत असल्याने ग्रामस्थांसह पोलीस प्रशासनही अवाक झाले.

मिळालेल्या माहितीनुसार गावातील काका व पुतण्या यांच्या नावावर असलेल्या साडेसात एकर शेतात ही अफूची शेती केली जात होती काका पुतण्याकडून बाहेरून आलेल्या मेंढपाळ लोकांनी ही शेती भाडेकराराने घेतली असून तेच शेती करत असल्याची माहिती दोघा संशयितांनी पोलीस प्रशासनाला दिल्यानंतर एवढ्या मोठ्या प्रमाणात अफूचे पीक घेण्यामागे आंतरराज्यीय टोळीचा सहभाग असावा असा संशय व्यक्त केला जात आहे.

संबंधित मेडपाळ कोठून आले, त्यांना अफूचे बियाणे कोणी उपलब्ध करून दिले, त्यांनी नेमके शिरूड तह या गावाची निवड कशी केली यामागील मुख्य सूत्रधार कोण असे अनेक प्रश्न निर्माण झाले असून पोलीस प्रशासनाने याचा गांभीर्याने तपास करून मुख्य सूत्रधारावर कठोर कारवाई केली पाहिजे, पोलीस प्रशासनातर्फे संपूर्ण रात्रभर गावाची व आजूबाजूच्या परिसरातील शेतीची तपासणी करण्यात येत होती आजूबाजूच्या इतर शेतातही अफूची शेती करण्यात आली आहे का याचा शोध स्थानिकांच्या मदतीने पोलीस प्रशासनातर्फे संपूर्ण रात्रभर घेतला जात आहे. सोमवारी सकाळी तहसीलदार डॉ. मिलिंद कुलकर्णी यांच्या उपस्थितीत संपूर्ण शेतातील तयार अफूच्या पिकाची कापणी करण्यात येऊन त्याची मोजणी करण्यात येणार आहे त्यानंतर एकूण किती किलो अफू झाला याची माहिती मिळणार आहे, अशी माहिती उपविभागीय पोलीस अधीक्षक श्रीकांत घुमरे यांनी यावेळी दिली घटनेची माहिती मिळाल्यानंतर पत्रकारांनी याबाबत अधिक माहिती विचारण्यात असता पोलिसांनी त्यावर मौन बाळगले संशयितांना फायदा होऊ शकतो म्हणून पत्रकारांना घटनास्थळावर फोटो व व्हिडिओ शूटिंग करायला पोलिसांनी मनाई केल्याने पोलिसांनी आज दिवसभराच्या कारवाईत काय केले याचा खुलासा पोलीस प्रशासनाने केला नाही ताब्यात असलेल्या दोघा संशयितांची नावेही पोलिसांनी पत्रकारांना दिली नाही.

स्थानिक गावकऱ्यांच्या म्हणण्यानुसार गेल्या काही महिन्यांपासून मेंढपाळांनी गावात वस्ती केली होती त्यांनी गावातील लोकांची शेती भाडेपट्ट्याने घेतली आहे या मेंढपाळांनी ही अफूची शेती केली असून त्यांना मोठ्या व्यक्तीचा वरदहस्त आहे पोलिसांनी केलेल्या कारवाईत साडेसात एकर शेतात तयार अफूचे पीक सापडले असून याचे स्थानिक बाजारपेठेत लाखोंच्या घरात किंमत असून आंतरराष्ट्रीय बाजारपेठेत कोट्यवधी रुपयांची किंमत आहे एवढ्या मोठ्या प्रमाणात शहादा तालुक्यात अफूची शेती पोलीस व महसूल प्रशासनाच्या डोळ्यात धूळ टाकून केली जात असल्याने या संपूर्ण प्रकरणाचा मुख्य सूत्रधार व यामागे असलेली आंतरराज्यीय टोळी याचा शोध घेऊन त्यांच्यावर कठोर कारवाई करण्याचे आव्हान पोलीस प्रशासनासमोर आहे.