सुरतजवळ नकली रेमडेसिविर इंजेक्शनचा कारखाना पोलिसांकडून उद्ध्वस्त

नंदुरबार : सुरतजवळील पिंजरज, ता. ओलपाड (गुजरात) येथील एका फार्महाऊसवर पोलिसांनी टाकलेल्या छाप्यात नकली रेमडेसिविर इंजेक्शनचा साठा आढळून आला. याच ठिकाणी हे नकली इंजेक्शन बनवीत असल्याचे उघड झाले असून, पोलिसांनी मुख्य आरोपीसह साठा व इंजेक्शन बनविण्याचे साहित्य जप्त केले आहे.

गुजरातमधील सुरत, बडोदा परिसरात नकली इंजेक्शन विक्री होत असल्याची चर्चा होती. या पार्श्वभूमीवर सुरत क्राईम ब्रॅंचने गुप्त तपास सुरू केला होता. त्यानुसार सुरतमधीलच वराछा परिसरात जयदेवसिंग झाला नावाचा व्यापारी इंजेक्शन विक्री करीत असल्याचे निदर्शनास आले. त्याला ताब्यात घेतल्यानंतर त्याने १२६ इंजेक्शन विक्री केल्याचे सांगून हे इंजेक्शन त्याने ओलपाड येथील कौशल वोराणी यांच्याकडून आणल्याचे सांगितले. त्यानुसार पोलिसांनी पिंजरज येथील कौशल वोराणी याच्या रायल बंगला या फार्महाऊसवर छापा टाकला असता तेथे बनवाट इंजेक्शन तयार होत असल्याचे आढळून आले. ग्लुकोज आणि मिठाचे पाणी मिश्रित करून हे इंजेक्शन बनविले जात होते. त्यासाठी त्यांनी मुंबईहून नकली रेमडेसिविर उत्पादनासंदर्भातील कागदपत्रांची प्रिटिंग केली होती. त्यांच्याजवळून जवळपास इंजेक्शनचा ४०० पेक्षा अधिक बॅाक्स आढळून आले. त्यात सुमारे सहा हजार नकली इंजेक्शन असल्याचे निदर्शनास आले आहे. यासंदर्भात पोलिसांनी सर्व साहित्यासह कौशल वोराणी यास ताब्यात घेतले आहे.