नंदुरबारात पोलिसाला तर नवापुरात वीज कर्मचाऱ्याला मारहाण

नंदुरबार : संचारबंदी काळात रस्त्यावर फिरणाऱ्यास हटकून शिस्त लावण्याचा प्रयत्न करणाऱ्या पोलीस कर्मचाऱ्याला मारहाण करण्यात आल्याची घटना शनिवारी रात्री घडली होती. दरम्यान, नवापूर तालुक्यातील बिलदा गावातही वीज कंपनीच्या वायरमनला मारहाण करण्यात आल्याची घटना रविवारी सकाळी घडली होती. याप्रकरणी मारहाण करणाऱ्यांविरोधात गुन्हे दाखल करण्यात आले आहेत.

नंदुरबार शहरातील तळोदा रोडवरील सी.बी. पेट्रोलियम समोर रविवारी रात्री ९.३० वाजेच्या सुमारास दिनेश नानाभाऊ ठाकरे हा जी.जे. ०५ सीएन १८७६ हे वाहन लावून गप्पा मारत होता. संचारबंदी सुरू असल्याने उपनगर पोलीस ठाण्याचे कर्मचारी देविदास गांगडे यांनी त्यास हटकले होते. यावरून दिनेश ठाकरे याने तू कोण मला गाडी बाजूला घ्यायला लावणारा, असे सांगून कॉन्स्टेबल गांगडे यांना शिवीगाळ करण्यास सुरुवात केली. दरम्यान, ठाकरे याने गांगडे यांच्या वर्दीची कॉलर धरून मारहाण करण्यास सुरुवात केली. यावेळी पोलीस पथकातील कर्मचारी घटनास्थळी दाखल झाल्याने ठाकरे यास आवर घालण्यात आला. दरम्यान, याबाबत पोलीस कॉन्स्टेबल देविदास गांगडे यांनी दिलेल्या फिर्यादीवरून संशयित दिनेश ठाकरे याच्याविरोधात शासकीय कामात अडथळा आणल्याप्रकरणी उपनगर पोलीस ठाण्यात गुन्हा दाखल करण्यात आला आहे. तपास सहायक पोलीस उपनिरीक्षक यादव भदाणे करत आहेत. संशयित दिनेश ठाकरे यास रविवारी अटक करण्यात आली होती. त्याला सोमवारी पोलिसांनी न्यायालयात हजर केले असता, ३ एप्रिलपर्यंत न्यायालयीन कोठडी सुनावण्यात आली असल्याची माहिती देण्यात आली आहे.

दरम्यान, नवापूर तालुक्यातील बिलदा येथे वीज वितरण कंपनीचे वायरमन दिलीप भागा गावित हे बिलदा या गावी गेले असता, नरेंद्र भरतसिंग गावित याने गावाचा वीजपुरवठा जास्त वेळ का बंद केला या कारणावरून त्यांच्यासोबत वाद घातला. दरम्यान, नरेंद्र गावित याने वायरमन दिलीप गावित यांची कॉलर धरून हाताबुक्क्यांनी मारहाण करण्यास सुरुवात केली. याप्रकरणी वायरमन दिलीप गावित यांनी नवापूर पोलीस ठाण्यात दिलेल्या फिर्यादीवरून संशयित नरेंद्र गावित याच्याविरोधात गुन्हा दाखल करण्यात आला आहे. तपास पोलीस उपनिरीक्षक नासीरखाँ पठाण करत आहेत.