प्रभाग १८ मधील शौचालयांची दुर्दशा

नंदुरबार : शहरातील प्रभाग क्रमांक १८ मधील सार्वजनिक शौचालयांची दुरावस्था झाली आहे. याकडे लोकप्रतिनिधींसह नगरपालिकेचे अक्षम्य दुर्लक्ष झाल्याने नागरिकांच्या आरोग्याचा प्रश्न ऐरणीवर आला आहे.

नंदुरबार शहरातील प्रभाग क्रमांक १८ मधील नवनाथ नगर परिसरातील पुरुषांच्या सार्वजनिक शौचालयाची अत्यंत दुरवस्था झाली आहे. स्थानिक नगरसेवकांसह नगरपालिकेचे दुर्लक्ष झाल्याचा आरोप नागरिकांनी केला आहे. स्वच्छ सर्वेक्षण २०२० -२१ मध्ये मोठा गाजावाजा करून शहरात स्वच्छतेचा डंका पिटला जात आहे. मात्र सध्या कोरोना परिस्थितीत प्रभाग क्रमांक १८ मधील पुरुषांच्या सार्वजनिक शौचालयांची अत्यंत दुरवस्था झाली आहे.

देखभालीच्या नावाखाली सेवा फाउंडेशन या संस्थेच्या ठेकेदाराने लाखो रुपये घेऊन दुर्लक्ष केले आहे. ३० सीटच्या असलेल्या या सार्वजनिक शौचालयातील स्वच्छतेचे तीन-तेरा वाजले आहेत. सार्वजनिक शौचालय वापरणे हा माझा अधिकार असे घोषवाक्य लिहून शहरात इतर ठिकाणचे शौचालयांची स्थिती काही अंशी बरी असल्याचे सांगण्यात येते. मात्र झोपडपट्टी आणि गरीब वसाहत असलेल्या नवनाथ नगर भागातील सार्वजनिक शौचालयांची दरवाजे, खिडक्या, फरशी तुटली असून पाण्याची देखील बोंबाबोंब असल्याने दैनंदिन उपयोगासाठी स्वच्छते अभावी नागरिकांचे आरोग्य धोक्यात आले आहे.

गेल्या वर्षभरापासून या सार्वजनिक शौचालयांचे कुणी वाली नसल्यामुळे नागरिकांना अनेक समस्यांना तोंड द्यावे लागत आहे. नवनाथनगर भागातील पुरुषांच्या सार्वजनिक शौचालयांची नियमित स्वच्छता होत नसल्यामुळे तीव्र संताप व्यक्त होत आहे.