पेट्रोल-डिझेल, सिलिंडर झाले महाग; घरोघरी खर्चकपात करणे पडतेय भाग

नंदुरबार शहरातील पेट्रोल व डिझेलचा सेस रद्द करण्यात आला आहे. यामुळे गेल्या वर्षापासून शहरात एक रुपया स्वस्त डिझेल मिळत होते. परंतु केंद्र सरकारकडून दरवाढीवर अंकुश ठेवता आल्याने दरदिवशी पेट्रोल-डिझेलचे दर वाढून पेट्रोल ९४.४९, तर डिझेलचे दर हे ८३.५९ रुपये प्रतिलिटर एवढे झाले आहेत. यातून सामान्य मध्यमवर्गीयांचे हाल होत असून महिन्याचे बजेट कोलमडले असल्याचे दिसून आले आहे. याबाबत काहींकडून प्रतिक्रिया घेतल्या असता, त्यांच्याकडून दरवाढीवर नाराजी व्यक्त करण्यात आली आहे.

पेट्रोल-डिझेल दरवाढीचा सर्वांनाच फटका बसतो आहे. वाहनाचा वापर मर्यादित करण्याची वेळ नागरिकांवर आली आहे. पेट्रोल व सिलिंडरचे दर वाढल्याने मासिक खर्च जुळवणे कठीण आहे. एलपीजी सिलिंडरचेही दर वाढत असल्याने चिंता वाढत आहेत.

-कैलास पाटील, नंदुरबार,

अनेक वस्तू महागल्या आहेत. यातून कमी पगार असलेल्या अनेकांना फटका बसला आहे. महिन्याचा खर्च कसा भागवावा असा प्रश्न समोर उभा राहतो आहे. महागाई कमी झाली पाहिजे. दरवाढ कायम राहिली तर पुढे खूप समस्या येतील.

- प्रशांत पाटील,नंदुरबार,

घरगुती सिलिंडरचे दर वाढल्याने मोठ्या अडचणींचा सामना करावा लागतो आहे. मर्यादित वापर शक्य नाही. जेवढे गरजेचे आहे तेवढा वापर तर करावाच लागेल. हे दर कमी झाले पाहिजेत. गृहिणींचे मासिक बजेट पूर्णपणे कोलमडत आहे. महिनाअखेरीस पैसे शिल्लकही राहत नाहीत.

- छाया माळी, नंदुरबार.