नवापुरातील खासगी कोविड सेंटर बंद केल्याने रुग्णांचे हाल

मार्च २०२० मध्ये सुरू करण्यात आलेल्या येथील अशशिफा कोविड केअर सेंटरमधील डॉक्टर्स आणि टीमने अहोरात्र रुग्णांना सेवा देत शेकडो रुग्णांना बरे केले आहे. जिल्हाधिकाऱ्यांनी इतर शहरात मिळणाऱ्या महागड्या उपचारापेक्षा अल्पदरात ही सुविधा येथील डॉक्टर देणार असल्याने कोविड रुग्णांच्या उपचाराला परवानगी देण्यात आली होती. कोरोनाच्या दुसऱ्या लाटेत नवापूर तालुक्यात कोरोना रुग्णांच्या संख्येत मोठ्या प्रमाणात वाढ होत असताना अचानक अशशिफा कोविड सेंटरच्या संचालकांनी कोरोना केअर सेंटरमध्ये उपचारासाठी येणाऱ्या रुग्णांमुळे स्थानिक नागरिक बाधित होतील, अशी भीती व्यक्त करूत कोरोना रुग्णांवर होणारे उपचार बंद केले.

याबाबत भाजपचे तालुकाध्यक्ष भरत गावीत, अल्पसंख्याक प्रदेश उपाध्यक्ष एजाज शेख, जयंतीलाल अग्रवाल, शहराध्यक्ष प्रणव सोनार, निलेश प्रजापत, स्वप्नील मिस्त्री व कार्यकर्त्यांनी खासदार डॉ. हिना गावीत, जिल्हाधिकारी व तहसीलदारांना निवेदन दिले आहे. निवेदनात म्हटले आहे की, अशशिफा कोविड सेंटरच्या संचालकांनी एका प्रतिष्ठित नगरसेवक व धनदांडग्यांच्या सांगण्यावरून गोरगरिबांवर अल्पदरात होणारे उपचार बंद केल्याने रुग्णांचे हाल होत आहे. नवापूर तालुक्यात कोरोना रुग्णांच्या संख्येत झपाट्याने वाढ होत आहे. जर वेळीच उपचार न मिळाल्यास व त्यामुळे रुग्ण दगावल्यास मृत्यूस जवाबदार कोण असणार असा प्रश्न उपस्थित करून उपचार बंद करणाऱ्या अशशिफा हॉस्पिटलच्या संचालकांनी हे केअर सेंटर पुन्हा पूर्ववत सुरू न केल्यास कायदेशीर कारवाई करण्यात यावी. तसेच आपत्ती व्यवस्थापन कायद्यांतर्गत कोविड रुग्णांचे जीव वाचविण्यासाठी अशशिफा हॉस्पिटल शासनाने ताब्यात घेऊन पोलीस बंदोबस्तात हॉस्पिटल सुरू करण्यात यावे, असे निवेदनात म्हटले आहे.