चाचा नेहरु बालमहोत्सवात ८२ संस्था व शाळांचा सहभाग

लोकमत न्यूज नेटवर्क
नंदुरबार : महिला व बाल विकास विभागांतर्गत स्वंयसेवी संस्थां व शहरातील विविध शाळांमधील मुले यांच्यासाठी चाचा नेहरु बालमहोत्सव गुरुवारपासून सुरु झाला़ महोत्सवाचे उद्घाटन जिल्हाधिकारी डॉ़ राजेंद्र भारुड यांच्याहस्ते करण्यात आले़ महोत्सवात ८२ शाळांच्या विद्यार्थ्यांनी सहभाग नोंदवला आहे़
कार्यक्रमास जिल्हा पोलीस अधिक्षक महेंद्र पंडीत, जिल्हा महिला व बाल विकास अधिकारी विनोद वळवी, बळवंत निकुंभ, बाल कल्याण समिती सदस्य मधुकर देसले, नितीन सनेर, सदस्या सीमा सूर्यवंशी, दावलशा बाबा महिला उन्नती मंडळाच्या अध्यक्षा वंदना तोरवणे, रोहिदास राठोड, डी. एस. बच्छाव, प्रकाश पाटील, विवेक पाटील उपस्थित होते़
कार्यक्रमात जिल्हाधिकारी डॉ़ भारुड यांनी सांगितले की, विविध बाल सुधारगृहातील बालकांचा आत्मविश्वास वाढून ते सर्वसाधारण मुलांसोबत स्पर्धेमध्ये सहभागी होवू शकतील, यातून त्यांचा विकास होईल यासाठी या स्पर्धेचे आयोजन करण्यात आले आहे़
पोलीस अधिक्षक महेंद्र पंडित यांनी विद्यार्थ्यांमधील कलागुणांना वाव देण्यासाठी विद्यार्थ्यांमधील कला गुणांना वाव देण्यासाठी अशा स्पर्धा आवश्यक असून शिक्षणासोबतच इतर उपक्रम आयुष्यात महत्वाचे असल्याचे सांगितले़
जिल्हा महिला व बाल विकास अधिकारी विनोद वळवी यांनी प्रास्ताविक केले़ सूत्रसंचालन डॉ़ उमेश शिदे यांनी तर आभार जिल्हा परिविक्षा अधिकारी जी. ए. जाधव यांनी मानले. यशस्वीतेसाठी जिल्हा संरक्षण अधिकारी भरत राणे, परिविक्षा अधिकारी दिनेश लांडगे, विधी सल्लागार एस.डी. वळवी यांनी परिश्रम घेतले़

महोत्सवात ८२ संस्था व शाळांच्या विद्यार्थ्यांसाठी महोत्सवात सांघिक खेळ, सांस्कृतिक कार्यक्रम व वैयक्तीक खेळांचे आयोजन करण्यात आले होते़ ६ ते १४ वयोगटातील १२८ मुले व २४६ मुली, १५ ते १८ वयोगटातील १०८ मुले व १२४ मुली सहभागी झाल्या आहेत़