पपई रोपे निघाली नर प्रजातीची, म्हसावद येथील शेतकऱ्यांची फसवणूक

याबाबत वृत्त असे की, एप्रिल महिन्यात म्हसावद येथील छोटूलाल लामगे व दौलत ठाकरे या शेतकऱ्यांनी बार्शी (ता. परांडा, जि. उस्मानाबाद) येथील परमेश्वर हनुमंत बानगुडे यांनी जे-१५ या प्रजातीच्या सहा हजार रोपांची साडेसहा एकर शेतात लागवड केली. रोपे देताना पपई पीक खरेदी करणे, चांगला भाव देणे, असे आमिषही दाखवण्यात आले. सहा हजार रोपांचे बिल निम्मे रोखीने, तर बाकी ऑनलाईन देण्यात आले. एप्रिल महिन्यात लागवड केलेल्या पपई पिकास औषधी, खते, मजुरी व इतर खर्च केला. पपईच्या रोपांची वाढ चांगली होऊन ती चार ते पाच फुटापर्यंत वाढली. मात्र फळधारणा न होता त्यांना तुरे निघत असल्याने ९० टक्के रोपे नर प्रजातीची असल्याचे आढळून आले. संबंधितांना शेतकऱ्यांनी शेतातील पिकाचे फोटो पाठवून संपर्क साधला असता, उडवाउडवीची उत्तरे देण्यात आली. शेवटी हताश होऊन शेतकऱ्यांनी रोटाव्हेटर मारून पपईचे पीक काढून टाकले. यामुळे दोन्ही शेतकऱ्यांचे मिळून दीड लाख रुपयांचे नुकसान झाले आहे. याबाबत म्हसावद पोलिसांत तक्रार केली असून, पोलीस निरीक्षक निवृत्ती पवार यांनी दहा दिवसांची सवलत दिली आहे. शेतकऱ्यांची भेट घेऊन झालेल्या नुकसानीबाबत आवश्यक ती कार्यवाही करण्यात येणार आहे.