लसीकरणाची ऑनलाइन बुकिंग होते १५ सेकंदांत फुल्ल

कोरोना लसीकरणासाठी कोविन व आरोग्य सेतू ॲपच्या माध्यमातून रजिस्ट्रेशन केल्यानंतर नोंदणी करायची आहे. वरील ठिकाणी रजिस्ट्रेशन सहजरीत्या होते. मात्र, शेड्युल टाइम स्लॉटसाठी ऑनलाइन नोंदणी करून कन्फर्मेशन मिळविण्यासाठी या वयोगटातील नागरिकांना कमालीचे कष्ट घ्यावे लागत आहे. विशेष म्हणजे, ऑनलाइन नोंदणी सुरू झाल्यापासून अवघ्या १५ सेकंदांत दररोज २५० बुकिंग फुल्ल होत असल्याने, या वयोगटातील नागरिक हतबल झाले आहेत.

शहादा शहर व तालुक्यासाठी केवळ शहरातील नागरी आरोग्य प्राथमिक केंद्र या एकमेव ठिकाणी १८ ते ४४ या वयोगटांतील नागरिकांसाठी लसीकरण केले जाते, तर ४५ व त्यापुढील वयोगटांतील नागरिकांसाठी या केंद्रासह तालुक्यात १६ ठिकाणी लसीकरणाची सुविधा प्रशासनाने उपलब्ध करून दिलेली आहे. १८ ते ४४ या वयोगटांसाठी केवळ एकमेव केंद्र लसीकरणासाठी उपलब्ध असल्याने नोंदणी व बुकिंग कन्फर्म असलेल्या नागरिकांचे येथे लसीकरण केले जात आहे. ज्यांची नोंदणी नाही, बुकिंग कन्फर्मेशन नाही, अशांचे लसीकरण येथे होत नाही. परिणामी, एकाच ठिकाणी लसीकरण होत असल्याने, दररोज सायंकाळी शहरासह तालुक्यातील किमान एक लाख नागरिक सायंकाळी पाच ते सहा या कालावधीत बुकिंगसाठी मोबाइल घेऊन बसत आहेत. मात्र, तीस सेकंदात दररोज २५० बुकिंग फुल्ल होत असल्याने, नागरिकांना नाहक मनस्ताप सोसावा लागत आहे.

१८ ते ४४ या वयोगटांतील नागरिकांच्या लसीकरणासाठी शहरातील नागरी प्राथमिक आरोग्य केंद्र या ठिकाणी सुविधा करण्यात आली आहे. शासनाकडून ज्या प्रमाणात लसीची उपलब्धता होत आहे, त्यानुसार दररोज लसीकरण केले जात आहे. येत्या काळात लसीची उपलब्धता वाढणार असून, त्यानुसार शहर व तालुक्यात लसीकरण केंद्राची संख्या वाढविण्यात येईल. ४५ वर्षे व त्यावरील वयोगटांसाठी मुबलक प्रमाणात लस उपलब्ध असून, ज्या नागरिकांचा एक डोस पूर्ण झाला असून, दुसऱ्या डोसची आवश्यकता आहे, अशांना प्राधान्य दिले जाईल.

-डॉ.चेतन गिरासे, प्रांताधिकारी तथा इन्सिडेंट कमांडर, शहादा