एकतर्फी प्रेमातून केला मुलीच्या वडिलांचा खून

लोकमत न्यूज नेटवर्क
नंदुरबार : खांडबारा येथे दोन दिवसांपूर्वी झालेल्या खुनाचा उलगडा झाला असून एकतर्फी प्रेमातून मुलीच्या मित्रानेच मुलीच्या वडिलांचा दगडाने ठेचून खून केल्याचे समोर आले आहे. संशयीतास नाशिक येथून अटक करण्यात आली आहे. दोन दिवसातच खूनाचा छडा लावण्यात एलसीबीला यश आले आहे.
देवदत्त उदेसिंग (२७) रा. कादरवाडी, कासगंज (उत्तर प्रदेश) हल्ली मु.नरहरीनगर, पाथर्डी फाटा, नाशिक असे संशयीताचे नाव आहे. त्याला अटक करण्यात आली आहे.
खांडबारा येथील शेतकरी भटूलाल काशिनाथ परदेशी यांचा त्यांच्या शेतातील घरात दगडाने ठेचून खून झाल्याची घटना २३ फेब्रुवारी रोजी उघड झाली होती. यामुळे परिसरात खळबळ उडाली होती. विशेष म्हणजे त्याच दिवशी परदेशी यांच्या मुलीला पहाण्यासाठी स्थळ येणार होते. विसरवाडी पोलिसात खुनाचा गुन्हा दाखल करण्यात आला होता. या गुन्ह्याचा समांतर तपास स्थानिक गुन्हा अन्वेशन शाखेतर्फे करण्यात येत होता.
पोलीस अधीक्षक महेंद्र पंडित यांनी स्थानिक गुन्हा अन्वेशनचे वरिष्ठ पोलीस निरिक्षक किशोर नवले यांचे पथक नियुक्त केले. नवले यांनी आपल्या अनुभवाच्या कौशल्यावर तपासाला सुरुवात केली. घटनास्थळी काहीही पुरावा मिळाला नाही. मयताच्या कुटूंबियांच्या दु:खात सहभागी होत त्यांच्याकडून माहिती जाणून घेण्याचा प्रयत्न केला, परंतु काहीही माहिती हाती लागली नाही. शेताच्या आजूबाजूच्या रखवालदारांनाही विचारणा केली, परंतु उपयोग झाला नाही. याच दरम्यान त्यांना परदेशी यांच्या मुलीच्या मित्राबाबत कळाले. मुलगी ज्या कंपनीत काम करीत होती त्याच कंपनीत संशयीत देवदत्त देखील काम करीत होता. दोघांची मैत्री असल्यामुळे तो खांडबारा येथे मुलीच्या घरी येत होता. तीन ते चार दिवस तो मुक्कामी राहत होता. ही कडी लक्षात घेवून देवदत्त याच्यावर किशोर नवले यांनी फोकस केला. याच दरम्यान त्यांना गुप्त बातमीदारामार्फत माहिती मिळाली आणि क्ल्यू मिळाला.
देवदत्त हा नाशिक येथे सध्या वास्तव्यास आहे. परंतु कुठल्या कंपनीत आहे, कुठे राहतो याबाबत काहीही माहिती नव्हती. अखेर माहिती काढत पथक नाशिक येथे आॅनलाईन खरेदी-विक्रीच्या कंपनीत कामास असल्याची माहिती मिळाली. त्याच परिसरात तो भाड्याच्या घरात मित्रांसोबत राहत असल्याचे स्पष्ट झाले. पुर्ण माहिती मिळताच पथकाने त्याला ताब्यात घेतले.
नंदुरबार येथे आणले असता त्याने गुन्ह्याची कबुली दिली. मयत परदेशी यांची मुलगी व संशयीत यांची ओळख पुण्यातील एका कंपनीत काम करतांना झाली होती. तो मुलीवर एकतर्फी प्रेम करू लागला होता. इकडे मुलीच्या विवाहाची तयारी सुरू झाली. स्थळ येवू लागले, ही बाब देवदत्त यास समजल्यावर तो बेचैन झाला. २३ रोजी तो बसने नाशिक येथून नंदुरबार व नंदुरबारहून खांडबारा येथे गेला.
रात्री शेतात त्याने भटूलाल परदेशी यांना सांगू लागला. परंतु परदेशी ऐकण्याच्या मनस्थितीत नव्हते. यावेळी त्याने परदेशी यांच्याशी झटापट केली. रागाच्या भरात त्यांच्या डोक्यात दगड घातला. त्यानंतर त्याने तेथून पळ काढला. रात्री रेल्वेने तो खांडबाराहून नंदुरबारला आला व तेथून तो नाशिकला बसने गेल्याचे त्याने पोलिसांना सांगितले.
ही कार्यवाही पोलीस अधीक्षक महेंद्र पंडित, अपर अधीक्षक चंद्रकांत गवळी, उपअधीक्षक रमेश पवार यांच्या मार्गदर्शनाखाली एलसीबीचे निरिक्षक किशोर नवले, विसरवाडीचे सहायक निरिक्षक गणेश न्हायदे, उपनिरिक्षक योगेश राऊत, एलसीबीचे हवालदार महेंद्र नगराळे, प्रमोद सोनवणे, पुष्पलता जाधव, जितेंद्र तोरवणे, विजय ढिवरे, मोहन ढमढेरे यांनी केली.