धडगाव शहरातील रस्त्यांची एका रात्रीत दुरुस्ती

मुख्यमंत्री उद्धव ठाकरे हे शुक्रवारी नंदुरबार जिल्हा दाैऱ्यावर येत आहेत. या पार्श्वभूमीवर धडगाव येथील ज.पो वळवी विद्यालयाच्या आवारात हेलिपॅड तयार करण्याचे काम बुधवारी रात्रीतून पूर्ण करण्यात आले. मुख्यमंत्री ठाकरे हे आरोग्य यंत्रणांचा आढावा घेणार असल्याने ग्रामीण रुग्णालय तसेच शहरातील विविध भागात स्वच्छता करण्यात आली आहे. ग्रामीण रुग्णालयात स्वच्छ बेडशीट, कचराकुंड्यांची स्वच्छता, स्वच्छतागृहांची सफाई करण्यात आली. सकाळपासून कर्मचारी वाऱ्याच्या वेगाने धावपळ करत कामे करत असल्याने याठिकाणी दाखल रुग्णही बुचकाळ्यात पडले होते. दरम्यान मुख्यमंत्री ठाकरे यांच्याकडून लसीकरण सुविधेचा आढावा घेतला जाणार असल्याची माहिती आहे. यासाठी लसीकरण कक्ष तयार करण्याचे कामही होत असल्याचे सांगण्यात आले. मुख्यमंत्री ठाकरे यांच्या या दाैऱ्यामुळे दुर्गम भागात उत्साहाचे वातावरण असल्याचे दिसून आले. मुख्यमंत्री उद्धव ठाकरे हे दुसऱ्यांदा धडगाव येथे येत असून यापूर्वी ते २०१९ मध्ये झालेल्या निवडणूक प्रचारासाठी आले होते.

मुख्यमंत्री हे हेलिपॅडवरुन मोटारीने शहरात येणार असल्याने रोझरीपाडा भागातील खड्डेमय रस्ता पूर्णपणे नव्याने करण्यात आल्याचे दिसून येत आहे. खड्ड्यांमध्ये खडी व डांबर टाकून त्यावर रोलर फिरवत पुन्हा डांबर टाकून रस्ता चकचकीत करण्याचे काम रात्री सुरु होते. सकाळीही काही भागातील खड्डे बुजवण्यात आले. दरम्यान मुख्यमंत्र्यांसोबत इतर मंत्र्यांची येण्याची शक्यता असल्याने धडगाव ते मोलगी दरम्याच्या रस्त्याचे कामही सुरु असल्याची माहिती आहे.