बिबटय़ाच्या हल्ल्यात एक जण गंभीर जखमी

लोकमत न्यूज नेटवर्क
खेतिया : पानसेमलपासून नजीक असलेल्या आमदा येथे अंगणात झोपलेल्या इसमावर बिबटय़ाने हल्ला करून जखमी केल्याची घटना घडली. दरम्यान, शनिवारी बिबटय़ाने युवतीवर हल्ला करून ठार केल्याची घटना व रविवारी इसमावर केलेल्या हल्ल्याच्या घटनांमुळे परिसरात प्रचंड भीतीचे वातावरण निर्माण झाले आहे.
याबाबत वृत्त असे की, आमदा, ता.पानसेमल येथील शिवदास पाडवी हे रविवारी रात्री नेहमीप्रमाणे आपल्या घराच्या आंगणात झोपले होते. रात्री साडेनऊ ते दहा वाजेदरम्यान अचानक बिबटय़ाने त्यांच्यावर हल्ला केला. बिबटय़ाने पंजाच्या सहाय्याने त्यांच्या मानेजवळ झडप घालून गंभीर जखमी केले. बिबटय़ाने तेथून शेताकडे पलायन केले. पाडवी यांना तात्काळ पानसेमल येथे प्राथमिक उपचार करून अधिक उपचारासाठी बडवानी जिल्हा रुग्णालयात हलविण्यात आले आहे. विशेष म्हणजे त्यांच्या घराजवळ बांधलेल्या शेळी किंवा बैल यांच्यावर हल्ला न करता चक्क माणसावर हल्ला केल्याने नागरिकांमध्ये प्रचंड भीतीचे वातावरण निर्माण झाले आहे. पाडवी यांच्या कुटुंबीयांच्या लक्षात हा प्रकार आल्यानंतर त्यांनी आरडाओरड केल्याने ग्रामस्थ जमा झाले. ग्रामस्थांनी लागलीच वनविभागाला घटनेची माहिती दिल्यानंतर वनविभागाचे अधिकारी व कर्मचारी घटनास्थळी पोहोचले. सेंधवा वनविभागाचे अधिकारी केशवसिंह पट्टा, विजय गुप्ता, उपवनमंडळ अधिकारी नोरके, पानसेमल वनपरिक्षेत्र सहाय्यक प्रदीप पवार, खेतिया वनपरिक्षेत्र सहाय्यक भुरू खान, खेतिया व पानसेमल वनविभागाचे कर्मचारी राजा मौर्य, बाबूलाल मौर्य, प्रमोद गुर्जर, महेश तोमर, निलेश पाटील, अनिल चौहान, संतोष आलोने, जितेंद्र मुवेल यांनी घटनास्थळी भेट दिली. बिबटय़ाला जेरबंद करण्यासाठी वनविभागाकडून शर्थीचे प्रयत्न करण्यात येत असून इंदूर येथून टायगर स्ट्राईक फोर्स रेस्क्यू टीमही पानसेमल व खेतिया परिसरात दाखल झाली आहे. लवकरच हिंस्त्र प्राणी व बिबटय़ांना जेरबंद करण्यात येईल, असे वनविभागातर्फे सांगण्यात आले.
दरम्यान, शनिवारी सायंकाळच्या सुमारास भडगोन शिवारात शेतातून घरी जाणा:या 17 वर्षीय संगीता आर्य या युवतीवर बिबटय़ाने हल्ला करून ठार केल्यानंतर रविवारी रात्री पुन्हा आमदा येथे शिवदास पाडवी यांच्यावर बिबटय़ाने हल्ला केला. या घटनांमुळे परिसरात प्रचंड भीतीचे वातावरण निर्माण झाले आहे.