दारू चोरी प्रकरणातील एकजण ताब्यत, तीन जण फरार

नंदुरबार : वॅाईन शॅाप फोडून चार लाख ९४ हजार रुपयांची दारू चोरीप्रकरणी एकास अटक करण्यात आली असून, त्याच्याकडून २२ हजार रुपयांची दारू जप्त करण्यात आली आहे. त्याचे एका अल्पवयीनसह तीन साथीदार फरार झाले आहेत. एलसीबीने ही कारवाई केली.

नंदुरबारातील गरीविहार गेट भागातील मोरे वॅाईन शॅाप फोडून चोरट्यांनी चार लाख ९४ हजार रुपयांची दारू चोरून नेल्याची घटना ६ मे रोजी घडली होती. संचारबंदी काळात आणि भरवस्तीत दारू दुकान फोडल्याने खळबळ उडाली होती. या घटनेचा तपास करण्याचे निर्देश पोलीस अधीक्षकांनी एलसीबीला दिले होते. त्यानुसार एलसीबीचे निरीक्षक विजयसिंग राजपूत यांनी पथक स्थापन करून तपासाला गती दिली. अशा प्रकारची चोरी करणाऱ्यांचा शोध घेतला असता सिलिंडर चोरी प्रकरणातील संशयित अविनाश यशवंत नरभवर यावर लक्ष केंद्रीत केले. तो सिंधी कॉलनी परिसरात फिरत असल्याचे लक्षात आल्यावर त्याला ताब्यात घेतले असता त्याने चोरीची कबुली दिली. वाईन शॅापमधील चोरीत आपल्यासह आणखी तिघे सहभागी असल्याचे सांगितले. त्यात आकाश रोहिदास पाडवी (रा. खोडाई माता मंदिराजवळ), विशाल बजरंग मराठे (रा. मोरे वाईन शॅापच्या बाजुला) व सिंधी कॉलनीतील एका अल्पवयीन मुलाचे नाव सांगितले. चोरी केेलेला दारूसाठा सिंधी कॉलनीतील बंद शाळेच्या मागील बाजूस लपविल्याचे सांगितले. तेथे तपासणी केली असता २२ हजार रुपये किमतीचे तीन बॅाक्स जप्त करण्यात आले. संशयित इतर तिन्ही फरार झाले आहेत. त्यांचा शोध घेतला जात आहे.

ही कारवाई पोलीस अधीक्षक महेंद्र पंडित, अपर अधीक्षक विजय पवार यांच्या मार्गदर्शनाखाली एलसीबीचे निरीक्षक विजयसिंग राजपूत, हवालदार जितेंद्र तांबोळी, राकेश मोरे, दादाभाई मासूळ, आनंदा मराठे यांच्या पथकाने केली.