पोषण ट्रॅक ॲप इंग्रजीत मात्र अंगणवाडी सेविकांचे शिक्षण जेमतेम

बामखेडा : शासनाच्यावतीने अंगणवाडी सेविकांना ग्रामीण भागात गरोदर माता, महिला, व बालकांचा डाटा घेण्यासाठी ‘पोषण ट्रॅक ॲपची’ सुविधा उपलब्ध करून देण्यात आली आहे. मात्र, जिल्ह्यातील बहुतांश अंगणवाडी सेविकांचे शिक्षण मुळातच अल्प शिक्षित आणि मराठी माध्यमांतून झाले असल्याने हे इंग्रजी ॲप वापरताना अंगणवाडी सेविकांना अनंत अडचणींना सामोरे जावे लागत आहे. यांमुळे पोषण ट्रॅक ॲपची भाषा मराठीतून करण्याची मागणी सर्वत्र होत आहे.

सहा महिन्यांपूर्वी जिल्ह्यातील अंगणवाडी सेविकांसाठी हे पोषण ट्रॅक ॲप सुरू करण्यात आले असून, याद्वारे सेविका कामाचा डाटा रोज अद्यावत करतात. परंतु ॲपमधील भाषा इंग्रजीत असल्याने व अंगणवाडी सेविकांना भाषा पुरेशी येत नसल्याने अनंत अडचणींचा सामना करावा लागत आहे. नंदुरबार जिल्ह्यात सुमारे अडीच हजारांपेक्षा अधिक महिला अंगणवाडी सेविका म्हणून कार्यरत आहेत. त्यांना दैनंदिन कामकाजासाठी शासनाकडून मोबाईल देण्यात आले आहेत. त्यामुळे जिल्हा व प्रकल्प कार्यालयाकडून अंगणवाडी सेविकांना व्यक्तीगतत मोबाईलवरच पोषण ट्रॅक ॲप डाऊनलोड करून त्यावरुनच माहिती भरणे सक्तीचे केले आहे. परंतु काही वयस्कर अंगणवाडी सेविका अल्पशिक्षित असल्या कारणाने त्यांना इंग्रजी भाषेचे फारसे ज्ञान नसल्याने दिवसभर काम करून ती माहिती भरताना त्यांना अनेक अडचणींना सामोरे जावे लागत आहे, म्हणून या पोषण ट्रॅक ॲपमध्ये माहिती भरताना त्याची भाषा इंग्रजी ऐवजी मराठीत करावी अशी मागणी जिल्ह्यातील संपूर्ण अंगणवाडी सेविकांमार्फत होत आहे.

अंगणवाडी सेविकांना पोषण ट्रॅक ॲपमध्ये इंग्रजीतून माहिती भरताना अडचणी येत आहेत आणि सेविकांच्या तशा तक्रारीदेखील शासनाकडे केलेल्या आहेत.बम्हणून त्यांना त्यांच्या दैनंदिन कामकाजाचा सर्व्हे करून सखोल माहिती भरायची असेल तर या ॲपची भाषा इंग्रजी ऐवजी मराठीमधून करावी तसा अहवाल शासनाकडे जिल्हा परिषद प्रशासनाने त्वरीत पाठवावा जेणेकरून भाषा विषयीच्या तांत्रिक अडचणीला अंगणवाडी सेविकांना सामना करावा लागणार नाही.