शहरातील नर्सरी, केजीच्या हजारो चिमुरड्यांचे पुढील वर्षही घरातच?

नंदुरबार : कोरोनाची भीती कायम आहे. पुढील टप्पा तर लहान मुलांवर सर्वाधिक प्रभावित करणारा ठरणार असल्याच्याही चर्चा आहेत. त्यामुळे पुढील शैक्षणिक वर्ष कसे असेल याचा अद्यापही अंदाज येत नाही. त्यामुळे प्राथमिक, माध्यमिक शाळेतील विद्यार्थ्यांसह शाळेची पहिली पायरी ठरणाऱ्या नर्सरी व केजीच्या चिमुकल्यांचे पुढील वर्षही घरीच जाणार असल्याचे जवळपास स्पष्टच आहे.

प्राथमिक शाळेच्या पूर्वतयारीसाठी नर्सरी व केजीचा टप्पा महत्त्वाचा मानला जातो. शहरी भागात मोठ्या प्रमाणावर खासगी संस्थांनी नर्सरी व केजीचे वर्ग सुरू केेले आहेत. विविध माध्यमातून पालकांना आपल्याकडे आकर्षित करण्यासाठी त्यांचा प्रयत्न देखील असतो. हजारो रुपये शुल्क भरून पालक अशा ठिकाणी आपल्या चिमुकल्यांना पाठवत असतात. नर्सरी, केजीमधील बडबड गीतापासून सुरू झालेला या चिमुकल्यांच्या शाळेच्या प्रवासासाठी सर्वच पालक उत्सुक असतात. परंतु गेल्या वर्षापासून नर्सरी व केजीचे वर्गच भरू शकले नाहीत. ऑनलाइनचा तर प्रश्नच नाही. चिमुकल्यांना त्यातील काय कळणार. त्यामुळे येणारे शैक्षणिक वर्ष देखील या चिमुकल्यांना घरातत काढावे लागणार हे स्पष्टच आहे.