रुग्णांसोबत जिल्ह्यातील चाचण्यांची संख्या घटली; पाॅझिटिव्हिटी रेट घसरला

नंदुरबार : मार्च महिन्यात कोरोनाचा विस्फोट झालेल्या नंदुरबार जिल्ह्याचा मृत्युदर आणि पाॅझिटिव्हिटी रेट वाढला होता. पाॅझिटिव्हिटी रेट थेट ३० टक्क्यांपर्यंत भिडल्याने चिंता व्यक्त होत होती. साधारण एप्रिल मध्यापर्यंत हा रेट कायम होता. परंतु चाचण्यांची घटलेली संख्या, बरे हाेणारे रुग्ण यामुळे जिल्ह्याचा पाॅझिटिव्हिटी रेट आता १९ टक्क्यांपर्यंत आला आहे.

आरोग्य विभागाकडून रॅपिड आणि आरटीपीसीआर अशा दोन्ही चाचण्यांची संख्या वाढवली गेल्याने १५ एप्रिलपर्यंत दर दिवसी साधारण तीन ते चार हजारापर्यंत चाचण्या केल्या गेल्या आहेत. यातून बाधित रुग्णांची संख्या ही ५००पेक्षा अधिकच असल्याचे दिसून आले होते. गेल्या काही दिवसात मात्र प्रशासनाने नंदुरबार शहर व जिल्ह्याच्या इतर भागातील चाचण्यांची केंद्रे कमी केल्याचे समोर आले आहे. नंदुरबार शहरात रॅपिड टेस्टची केवळ दोनच केंद्र सध्या सुरू आहेत.

जिल्हा आरोग्य विभागाने मार्च महिन्यात कोरोनाचा धोका लक्षात घेत, रॅपिड ॲंटिजेन टेस्ट सुरू केल्या. यासाठी गावोगावी पथकांची नियुक्ती केली. जिल्हा आरोग्य अधिकारी यांच्या सूचनेनुसार तालुका वैद्यकीय अधिकारी व जिल्ह्यातील ६० प्राथमिक आरोग्य केंद्रात काम करणारे वैद्यकीय अधिकारी व आरोग्य कर्मचारी यांची पथके नियुक्त करत ग्रामीण भागात लक्षणे असलेल्यांच्या चाचण्या करून त्यांना उपचार मिळवून दिले.

नंदुरबार, शहादा, तळोदा व नवापूर या चार तालुक्यात रॅपिड टेस्ट व स्वॅब कलेक्शन करण्यावर भर देण्यात आला. रॅपिड टेस्ट करूनही लक्षणे असलेल्यांचे स्वॅब कलेक्शन करून आरटीपीसीआर लॅबमध्ये तपासण्या करण्यात आल्याने अनेक अडचणी दूर झाल्या.

आरटीपीसीआर लॅबची क्षमता वाढल्याने अडचणी झाल्या दूर

रॅपिड ॲंटिजेन चाचण्यांमध्ये वाढ झाली असताना जिल्हा सामान्य रुग्णालयातील आरटीपीसीआर लॅॅबची क्षमता वाढवण्यात प्रशासनाला यश आले. तीन महिन्यापूर्वी साधारण दिवसाला एक हजार चाचण्या होणाऱ्या लॅबमध्ये आता दिवसाला दोन हजार किंवा त्यापेक्षा अधिक चाचण्या होतात.

जिल्ह्यात टेस्ट किटचा साठा मुबलक असल्याने दर दिवशी टेस्टिंग वाढवून समोर आलेल्या बाधितांना उपचार देण्यासाठी प्रयत्नशील असल्याचे आरोग्य विभागाकडून सांगण्यात आले.

आरोग्य विभागाकडून ग्रामीण भागात अधिकाधिक चाचण्या व्हाव्यात यासाठी प्रयत्न करण्यात येत आहेत. यासाठी ग्रामीण भागात स्वॅब कलेक्शन व रॅपिड चाचणीचे शिबिरे घेण्यात आली होती. अद्यापही ग्रामीण भागात रॅपिड टेस्ट करण्यावर भर देण्यात येत आहे. यात रुग्णांची संख्या कमीअधिक प्रमाणात आढळून येत आहेत.

-डाॅ. एन.डी. बोडके

जिल्हा आरोग्य अधिकारी, नंदुरबार