अक्कलकुवा येथे विनामास्क व गर्दी करणाऱ्यावर कारवाईची गरज

जनता कर्फ्यूत कोरोना प्रतिबधंक नियमांचे उल्लंघन करणाऱ्याव पोलीस प्रशासनाकडून तोकडी कारवाई केली जात आहे. अक्कलकुवा शहरासह तालुक्यातील कोरोना सक्रिय रुग्णांची संख्या गेल्या पंधरा दिवसांमध्ये मोठ्या प्रमाणावर वाढली असून सध्या तालुक्यात ६० रुग्ण कोरोना पॅाझिटिव्ह आहेत. त्यातील अधिकाधिक रूग्ण होम आयसोलेशनमध्ये असून ८ ते १० रुग्ण रुग्णालयात उपचार घेत आहेत. सद्य:स्थितीत तालुक्यात कोरोना बाधितांची संख्या सध्या नियंत्रणात असली तरी तपासण्या वाढण्याची गरज आहे. त्यामुळे आरोग्य विभागाने त्यासंदर्भात योग्य खबरदारी घेत उपाययोजना करण्याची आवश्यकता निर्माण झाली आहे. प्रशासनाने दिलेल्या आदेशाप्रमाणे जनतेने टाळेबंदी कालावधीत नियमांचे काटेकोरपणे पालन करणे गरजेचे आहे. तरुणांनी विनाकारण फिरू नये, तसेच सर्व दुकानदारांनी प्रशासनाने दिलेल्या आदेशांचे पालन करावे अन्यथा यापुढे कठोर कारवाई करण्यात येईल, असे आवाहन पोलीस निरीक्षक राजेश शिंगटे यांनी दिले आहे.

संचारबंदीत गर्दीचे सत्र

जिल्ह्यात संचारबंदी लागू असताना अक्कलकुवा तालुक्यातील खापर व मोलगी गावांमध्ये भाजीपाला व किराणा दुकानांवर खरेदी करण्यासाठी नागरीकांची मोठ्या प्रमाणावर गर्दी होत असून,त्यामुळे कोरोना प्रतिबंधक नियमांचे उल्लघंन होत असल्याने या ठिकाणी सामाजिक अंतर पाळण्याची आवश्यकता असून, नागरिकांनी तोंडावर मास्क लावणे अत्यंत गरजेचे असताना या बाबीकडे दुर्लक्ष होताना दिसून येत आहे नागरिकांनी प्रशासनाने घालून दिलेल्या नियमांचे काटेकोरपणे पालन करण्याचे आवाहन तालुका आरोग्य अधिकारी स्वप्निल वानखेडे यांच्यातर्फे वारंवार केले जात आहे.