बांबू कापल्याच्या रागातून एकाचा खून

लोकमत न्यूज नेटवर्क
नंदुरबार : शेतातील बांबूची झाडे कापल्याच्या वादातून एकाला बांबूनेच मारून ठार केल्याची घटना खडकीचा गुराडपाडा, ता.धडगाव येथे २९ रोजी घडली. याप्रकरणी एकाविरुद्ध म्हसावद पोलिसात खुनाचा गुन्हा दाखल करण्यात आला आहे. संशयीतास अटक करण्यात आली.
जलसिंग होणाऱ्या रावताला (३५) रा.खडकीचा आमदरीपाडा असे मयताचे नाव आहे. तर प्रकाश उर्फ सान्या छगन नाईक, रा.खडकी, ता.धडगाव असे अटक केलेल्य संशयीत आरोपीचे नाव आहे. पोलीस सूत्रांनुसार, जलसिंग रावताला यांच्या शेतातील बांबूची झाडे प्रकाश उर्फ सान्या नाईक यांनी कापले होते. त्यावरून त्यांच्यात होळीच्या सुमारास वाद देखील झाला होता. वाद आपसात झाल्याने त्यांनी पोलिसात न जाता आणि कुणाला काहीही न सांगता वाद मिटविला होता.
मात्र २९ आॅगस्ट रोजी त्याच कारणावरून दोघांमध्ये पुन्हा वाद झाला. त्यात सान्या नाईक यांनी जलसिंग रावताला यांना बांबूने डोक्यावर, कपाळावर, नाकावर व छातीवर बेदम मारहाण केली. त्यात त्यांन गंभीर मार लागल्याने त्यांचा मृत्यू झाला. याबाबत मेरवान होणाºया रावतळे यांनी म्हसावद पोलीस ठाण्यात फिर्याद दाखल केली. त्यांच्या फिर्यादीवरून प्रकाश उर्फ सान्या छगन नाईक यांच्याविरुद्ध म्हसावद पोलीस ठाण्यात खुनाचा गुन्हा दाखल करण्यात आला आहे. पोलिसांनी लागलीच प्रकाश उर्फ सान्या नाईक यास अटक केली आहे. तपास सहायक पोलीस निरीक्षक किरण पवार करीत आहे.