पालिका सफाई कामगारांना मिळणार सार्वजनिक सुट्टी

सफाई कामगारांच्या विविध मागण्या मंजूर व्हाव्यात यासाठी महाराष्ट्र सफाई कामगार संघटनेचे अध्यक्ष कुंदन थनवार यांनी पालिकेला निवेदन दिले होते. त्यानंतर सुमारे दोन वर्षांपूर्वी तत्कालीन जिल्हाधिकारी डॉ. मल्लिनाथ कलशेट्टी यांच्या उपस्थितीत बैठक झाली. त्यादेखील पालिका कर्मचार्‍यांच्या मागण्या मंजूर करण्याचे आणि समस्या सोडवण्याचे आदेशित करण्यात आले होते. मात्र पालिका सफाई कर्मचार्‍यांचे प्रश्न सुटले नाहीत. पर्यायाने २७ जानेवारी पासून जिल्हाधिकारी कार्यालयासमोर थनवार यांनी या मागणीसाठी बेमुदत उपोषण सुरू केले. २९ जानेवारीला पालिकेचे मुख्याधिकारी राजेंद्र शिंदे यांनी दिलेल्या आश्वासनानुसार उपोषण मागे घेण्यात आले.

विविध मागण्यांमध्ये नंदुरबार पालिकेच्या सफाई कामगारांना सार्वजनिक सुट्टी देण्याची मागणी करण्यात आली होती. या मागणीची पूर्तता करण्यासाठी शिंदे यांनी पालिकेच्या सफाई कामगारांना सार्वजनिक सुट्टी देण्याचे घोषित केले. याबाबतच्या पत्रात म्हटले आहे, की पालिकेच्या कायम सफाई कर्मचार्‍यांना सार्वजनिक सुट्टी देण्यात येईल. सार्वजनिक सुट्टीच्या दिवशी कामावर येण्याची आवश्यकता नाही. जर काही कारणास्तव कामावर बोलावण्यात आले तर त्याची तशी वेगळी नोंद घेऊन त्यांना नंतर पर्यायी सुट्टी दिली जाईल.

मुख्याधिकारी यांचा सत्कार

सफाई कामगारांच्या मागण्या मंजूर होत आहेत. काही मागण्यांबाबत विचार सुरू आहे. सार्वजनिक सुट्टी देण्याबाबतचे पत्र संघटनेला देण्यात आले. म्हणून सफाई कामगार संघटनेतर्फे थनवार यांनी राजेंद्र शिंदे यांचा त्यांच्या दालनात सत्कार केला. यावेळी रामसिंग थनवार, नंदू बैसाणे रोनेश तेजी, दिनेश टाक, डान्स सर जित धनवार, मेघराज थनवार, फकिरा नखाडे, धरम कडोसे, नटवर कोळी, दिनेश बट्ट, लखन जाधव, सोनू भिडे, जीवन भगवाने आदी उपस्थित होते.