महावितरणचा ‘शॉक’; मीटर रीडिंग घेण्यास दिवसाचा उशीर, हजाराचा बसतो फटका!

वीज कंपनीच्या नियमानुसार प्रत्येक वीज ग्राहकाचे वीज मीटर रीडिंग हे प्रत्येक महिन्याच्या एक ते आठ तारखेपर्यंत घेण्यात येऊन त्यानंतर संबंधित ग्राहकाला मासिक वीज बिल पाठवावे, असे असतानाही नियमित कालावधीत मीटर रीडिंग घेतली जात नसल्याने यात वीज ग्राहकांचे मोठ्या प्रमाणात आर्थिक नुकसान होत आहे. मुळात ग्राहकांची संख्या सर्वाधिक असली तरी त्या तुलनेत मीटर रीडिंग घेणाऱ्यांची संख्या अपूर्ण असल्यामुळे हा प्रकार घडत असावा, असा युक्तिवाद वीज कंपनीमार्फत करण्यात येत असला तरी कंपनीने मीटर रीडिंग घेण्यासाठी खाजगी ठेकेदाराला नियुक्त केले असून, ठेकेदार स्वतःच्या आर्थिक हितासाठी रीडिंग घेणाऱ्या कर्मचाऱ्यांची संख्या कमी ठेवत असल्याने बऱ्याच ठिकाणी मीटर रीडिंग हे १० ते १५ तारखेपर्यंत घेतले जाते. परिणामी ग्राहकाचे मागील महिन्यातील व चालू महिन्यातील १५ तारखेपर्यंतचे वीज युनिट मोजले जातात व त्यानुसार बिल आकारणी केली जाते. यामुळे सवलतीचा दर कमी वीज वापर करूनही ग्राहकाला मिळत नाही. याउलट वाढीव वीज दराने वीज वापर करावा लागत आहे.

ही घ्या उदाहरणे

माझा छोटासा व्यवसाय आहे. व्यावसायिक दराने पहिल्या १०० युनिटसाठी मला सात रुपये प्रतियुनिट अशी आकारणी केली जाते. माझा वीज वापर कमी असतानाही नियमितपणे दरमहा रीडिंग घेतली जात नसल्याने मला १०० पेक्षा अधिक युनिट येत असल्याने वाढीव दराने वीज बिल भरावे लागते. - साजिद मलिक, वीज ग्राहक.

आम्ही ग्रामीण भागात राहतो. नियमितपणे वीज मिळत नसली तरी दोन-तीन महिन्यांतून एकदा मीटर रीडिंग घेतली जाते. परिणामी विजेचा वापर कमी असतानाही वाढीव वीज बिल भरावे लागते. दरमहा मीटर रीडिंग घेतले गेले तर निश्‍चितच यात आम्हाला सवलतीच्या दरात वीज बिलाची आकारणी केली जाईल व आमचे आर्थिक नुकसान वाचेल. वीज कंपनीने कारभारात सुधारणा करणे आवश्यक आहे. - दित्या ठाकरे, वीज ग्राहक.

वीज कंपनीमार्फत ग्राहकांना वीज बिल दिले जाते. शहरातील बहुतांश भागात ऑटो मीटर रीडिंग घेतली जाते तर अनेक ठिकाणी घरोघरी जाऊन मीटर रीडिंग घेतली जाते. एखाद्या ग्राहकास जास्तीचे बिल दिले असल्यास ते विभागून देण्यात येते. त्यामुळे ग्राहकांना आर्थिक भुर्दंड सोसावा लागत नाही. मुदतीत रीडिंग घेतले गेले नाही तर अशा ग्राहकांनी वीज कार्यालयाशी संपर्क साधावा. वीज ग्राहकांनी आपला मोबाइल क्रमांक कंपनीकडे नोंदवावा. प्रत्येक बिलावर किती दिवसांचे वीजबिल आहे याची नोंद असते. - बी.व्ही. जगताप, उपकार्यकारी अभियंता, वीज वितरण कंपनी, शहादा

शहरातील वीज ग्राहक संख्या

व्यावसायिक - ३०४७

कृषी - ७९००

रहिवासी - २६,२९५

औद्योगिक - ६४५

घरगुती वीज वापरासाठी पहिल्या १०० युनिटसाठी तीन रुपये ४० पैसे प्रतियुनिट वीजबिल आकारले जाते.

घरगुती वापरासाठी १०१ ते ३०० साठी सात रुपये ४३ पैसे प्रतियुनिट आकारणी केली जाते.

ज्या ग्राहकांचा मासिक विजेचा वापर हा १०० पेक्षा कमी युनिट आहे. मात्र, मुदतीनंतर रीडिंग घेतले जात असल्याने साहजिक त्यांचा वापर १०० पेक्षा अधिक होत असल्याने त्यांना पहिल्या १०० युनिटसाठी असलेल्या सवलतीच्या दराऐवजी जवळपास दुप्पट दर प्रतियुनिट आकारला जात असल्याने वीज वापर कमी करूनही नाहक आर्थिक भुर्दंड सोसावा लागतो. हा प्रकार वीज मीटर रीडिंग हे उशिरा होत असल्याने घडत आहे.

वीज मीटर रीडिंग नियमित होत नसल्याने ग्रामीण भागात कृषी वीज ग्राहकांना मोठा आर्थिक भुर्दंड सोसावा लागतो. परिणामी थकीत वीज बिलाचे प्रकार वाढत आहेत.

व्यावसायिक व औद्योगिक वापराचे दर सर्वाधिक असल्याने नियमित वीज मीटर रीडिंग घेतली गेली नाही तर वीज बिलात मिळणाऱ्या सबसिडीच्या लाभाला मुकावे लागते व वाढीव दराने वीज बिल भरावे लागते.