माॅर्निंग वाॅक आरोग्यासाठी की कोरोना घरात आणण्यासाठी?

नंदुरबार : कोरोनाच्या पार्श्वभूमीवर सुरू असलेल्या लाॅकडाऊनमुळे अनेकजण घरीच असल्याने अनेक बाबी करून पाहात आहेत. यात माॅर्निंग वाॅकचाही समावेश आहे. परिणामी गेल्या महिनाभरात वाॅक करणारे अचानक वाढल्याचे चित्र असून, यातही सोशल डिस्टन्सिंग हरवल्याचे चित्र काही ठिकाणी दिसून आले, तर काही ठिकाणी माॅर्निंग वाॅक दरम्यानही सुरक्षा उपाय करत असल्याचे दिसून आले.

नंदुरबार शहरात नगरपालिकेेने रस्त्यांचे जाळे निर्माण केले आहे. याचा लाभ घेत सकाळी आणि सायंकाळी अनेकजण वाॅक करतात. या वाॅकिंगसोबतच मोकळ्या मैदानांवर व्यायाम, क्रिकेटसह इतर खेळही रंगतात. सध्या कोरोनामुळे लाॅकडाऊन सुरू आहेे. परिणामी नागरिक घरीच असून, यातून आलेला स्थूलपणा, नैराश्य तसेच आरोग्याची काळजी म्हणून सकाळी लवकर उठून चालण्याचा व्यायाम अर्थात वाॅक केला जात आहे. शासनाकडून लाॅकडाऊन असल्याने अनेक बाबींना बंदी असली तरी नागरिक आरोग्याच्या दृष्टीने काळजी घेत असल्याने त्यास एक प्रकारे सूटच असल्याचे दिसून आले आहे. परंतु सकाळच्या माेकळ्या हवेत गटागटाने फिरणे योग्य आहे का, असा प्रश्न वैद्यकीय तज्ज्ञांकडून उपस्थित करण्यात येत आहे.

पोलिसांकडूनही सूट

गेल्या वर्षी लाॅकडाऊन सुरू झाल्यानंतर माॅर्निंग वाॅक करणाऱ्या महिला आणि पुरुषांना पोलीस पथकाकडून ताब्यात घेत त्यांच्यावर शहरातील त्या - त्या पोलीस ठाण्यांतर्गत गुन्हे दाखल करून न्यायालयातही हजर करण्यात आले होते.

सुमारे ६५० जणांवर ही कारवाई करून दंडही वसूल करण्यात आला होता. यानंतर मात्र वेळोवेळी झालेल्या लाॅकडाऊनमध्ये नागरिकही सावधगिरीने कोरोना उपाययोजना करून घराबाहेर पडत होते.

कोरोना काळात आरोग्य चांगले ठेवणे गरजेचे असल्याने पोलीस व प्रशासनानेही याकडे दुर्लक्ष केल्याचे दिसून आले. यातून सकाळी गर्दी वाढली आहे.

दरम्यान, दिवसभर घरात असलेले ज्येष्ठ नागरिक चांगल्या आरोग्यासाठी सकाळी घराबाहेर पडतात. यातून व्यायाम होतो. दरम्यान, कोरोना विषाणू हवेतून पसरण्याची भीतीही असल्याने मास्कचा नियमित वापर करत असल्याची माहिती ज्येष्ठांकडून देण्यात आली.