बोरद प्राथमिक आरोग्य केंद्रातील लसीकरणाचा आमदारांकडून आढावा

ग्रामीण भागात लसीकरणाचा सर्वस्तरावरून आढावा घेतला जात आहे. लोकप्रतिनिधींकडूनही लसीकरण केंद्रांना भेटी दिल्या जात आहेत. याअंतर्गत आमदार राजेश पाडवी यांनी बोरद येथे मंगळवारी भेट दिली. प्रसंगी याठिकाणी लसीकरण सुरू असल्याचे दिसून आले. भेटीदरम्यान उपस्थित आरोग्य कर्मचाऱ्यांनी उपलब्ध लस, औषध साठा याची माहिती दिली. बोरद उपकेंद्रांतर्गत आतापर्यंत सुमारे ४ हजार नागरिकांचे लसीकरण पूर्ण करण्यात आले आहे. यात ज्येष्ठ नागरिकांची संख्या मोठी आहे. दरम्यान, येथे लसीची दुसरी मात्रा आता उपलब्ध झाली असून ती देण्याचे काम सुरू झाले आहे. आमदारांनी बोरद प्राथमिक आरोग्य केंद्राच्या नूतन इमारतीच्या बांधकामाची पाहणी करून चाैकशी केली.

भेटीदरम्यान केंद्राच्या वैद्यकीय अधिकारी डाॅ. रेखा शिंदे व आरोग्य पर्यवेक्षिका अरुणा चाैधरी ह्या अनुपस्थित असल्याची माहिती देण्यात आली. दोघीही नंदुरबार येथे लस घेण्यासाठी गेल्याचे कर्मचाऱ्यांकडून आमदार पाडवी यांना सांगण्यात आले.

यावेळी भाजपचे जिल्हा चिटणीस नारायण ठाकरे, वीरसिंग पाडवी, प्रवीण वळवी, आरोग्य कर्मचारी दीपक पाटील, सुमित्रा पाडवी, भारती भामरे, उमेश शिरसाठ, संदीप शेलार, विकास पाडवी उपस्थित होते.