चिखली येथे नर्मदा जीवन शाळांच्या विद्यार्थ्यांचा मेळावा

नर्मदा नवनिर्माण अभियानामार्फत सातपुड्यातील दऱ्याखोऱ्यात राहणाऱ्या विद्यार्थ्यांसाठी साधारण १३ जीवन शाळा सुरू आहेत. गेल्या अनेक वर्षापासून या शाळांमध्ये या विद्यार्थ्यांना प्राथमिक शिक्षण दिले जाते. या मुला-मुलींच्या कलागुणांबरोबरच विविध खेळांच्या स्पर्धांसाठी या जीवन शाळांचा बालमेळावा आयोजित करण्यात येतो. यंदाच्या २३ व्या बाल मेळाव्याचे आयोजन चिखली पुनर्वसन, ता.शहादा येथे करण्यात आले आहे. या मेळाव्याचे उद्घाटन शुक्रवारी नर्मदा बचाव आंदोलनाच्या नेत्या मेधा पाटकर, सई तांबे, असलम बागवान, हनीफ तडवी, स्मिता तांदळे, सुवर्णा शिंदे यांच्या हस्ते करण्यात आले. तत्पूर्वी गावातून आदिवासी पारंपरिक वाद्याने विद्यार्थी, पालक व ग्रामस्थांनी रॅली काढली. या रॅलीत विविध घोषणा देण्यात आल्याने चिखली परिसरातील शैक्षणिक वातावरण ढवळून निघाले होते. या वेळी प्रमुख पाहुण्यांनी शासनाच्या कुठल्याही आर्थिक मदतीशिवाय जीवन शाळांमधील विद्यार्थ्यांच्या शैक्षणिक गुणवत्तेबरोबरच त्यांच्यातील कलागुण पाहून तोंड भरून कौतुक केले. सई तंबे, असलम बागवान व मेधा पाटकर यांनी मार्गदर्शन केले.

जीवन शाळांमधील विद्यार्थिनींनी आपल्या हस्तकलेतून विविध वस्तू तयार केल्या आहेत. या वस्तूंचे प्रदर्शनही मांडण्यात आले आहे. खो-खो, कबड्डी, मल्लखांब अशा वेगवेगळ्या मैदानी स्पर्धांसह इतर अनेक खेळ व सांस्कृतिक कार्यक्रमही मेळाव्यात होणार आहे. कार्यक्रमास पं.स.च्या माजी सभापती वनिता पटले, युवराज भटकळ, प्रसाद अग्रवाल, प्रवीण तडवी, प्रियंका तुपे, बिस्मिल्ला सायद, मारुती कंदारे, मनीषा देशपांडे, कमल यादव, श्याम मदाने, प्रा.जयपाल शिंदे आदींसह पालक व ग्रामस्थ उपस्थित होते.सूत्रसंचालन चेतन साळवे यांनी केले. कार्यक्रमासाठी लतिका राजपूत, खेमसिंग पावरा, दिनेश पाडवी, महेंद्र तोमार, तुकाराम पावरा यांच्यासह जीवन शाळेतील शिक्षक परिश्रम घेत आहेत.