दहा रिक्त पदांमुळे मंदाणे आरोग्य केंद्राचे कामकाज वाऱ्यावर

शहादा तालुक्याच्या पूर्व आदिवासी व ग्रामीण भागातील मध्यप्रदेश सीमेलगत असलेले मंदाणे हे मध्यवर्ती व बाजारपेठेचे गाव आहे. या गावाशी सुमारे ४० ते ४५ खेडेगावातील नागरिकांची दैनंदिन बाजारहाट व अन्य कामांसाठी मोठी वर्दळ असते. या ठिकाणी स्वतंत्र प्राथमिक आरोग्य केंद्र कार्यान्वित आहे; मात्र येथील विविध समस्या पाहिल्यास आरोग्य केंद्राचेच आरोग्य धोक्यात आलेले आहे. जमीनदोस्त झालेले वॉल कंपाऊंड, शस्त्रक्रिया इमारतीची झालेली पडझड, वैद्यकीय अधिकारी निवासस्थानाची मोडकळीस आलेली इमारत, पाण्याची तीव्र समस्या, कर्मचाऱ्यांची कमतरता, शवविच्छेदन गृह फक्त नावालाच अशा विविध समस्या असल्याने या समस्यांकडे जिल्हा परिषद प्रशासनाचे पूर्णपणे दुर्लक्ष झालेले आहे.

१० जागा रिक्त

मंदाणे आरोग्य केंद्रात दैनंदिन रुग्णांची संख्या मोठी असते. या भागातील शहाणे व वाघर्डे येथे स्वतंत्र आरोग्य केंद्र कार्यान्वित असले तरी या दोन्ही आरोग्य केंद्राच्या कार्यक्षेत्रातील गावे ही मंदाणे गावाच्या जवळपास असल्याने तेथील रुग्णांना मंदाणे गाव आरोग्य केंद्रात येणे सोयीचे असल्याने याच आरोग्य केंद्रात रुग्णांची मोठी गर्दी असते; मात्र या केंद्रात आस्थापनेवरील कर्मचारी संख्या अपूर्ण असल्याने रुग्णांची मोठी गैरसोय होत आहे. सर्व भार आरोग्य सेविकांवर आहे. या केंद्रात औषध निर्माता व प्रयोगशाळा तंत्रज्ञ ही दोन्ही पदे एक वर्षापासून रिक्त आहेत. त्यामुळे औषधी व गोळ्या वाटपाचे कामही आरोग्य सेविकांना करावे लागते. रुग्णाचे रक्त व लघवी तपासणी कर्मचाऱ्यांअभावी केली जात नसल्याने रुग्णांवर योग्य उपचार करण्यास अडचणी येत आहेत. यामुळे प्रयोगशाळा तंत्रज्ञ हे पद तातडीने भरणे अत्यावश्यक आहे. तसेच मंदाणे आरोग्य उपकेंद्र क्रमांक एकमध्ये आरोग्यसेविका व एमपीडब्ल्यू दोन्ही पदे रिक्त आहेत. मंदाणे उपकेंद्र क्रमांक २ व असलोद उपकेंद्र या दोन्ही ठिकाणी देखील एमपीडब्ल्यू ही पदे रिक्त आहेत. त्याचबरोबर याच आरोग्य केंद्रात शिपाई एक,सफाईगार एक, लिपिक एक तसेच आरोग्य केंद्रातील ओपीडीसाठीचे आरोग्य सेविकेचे पदही रिक्त आहे .एकूण १० पदे रिक्त असल्याने खूप गैरसोय होत आहे. डॉक्टरने रुग्णांची तपासणी केल्यानंतर पुढील सर्व भार आरोग्यसेविकांवर येतो. त्यात रुग्णाला इंजेक्शन देणे, ड्रेसिंग करणे, गोळ्या औषधे देणे ,गावात विविध आरोग्य उपक्रमात सहभागी होणे अशी कामे करणे आरोग्यसेविकांना अवघड होऊन बसले आहे. त्यामुळे येथील सर्व पदे तातडीने भरली जावीत अशी मागणी नागरिकांनी केली आहे.

कोरोना महामारीची भर

या आरोग्य केंद्रात संख्या अपूर्ण असताना येथील सध्या कार्यरत असलेल्या कर्मचाऱ्यांवर कोरोना महामारीमुळे कामाचा ताण वाढलेला आहे. त्यामुळे काम करणे कसरतीचे ठरत आहे. मंदाणे व परिसरात कोरोना बाधितांची संख्या व मृत्यूसंख्या दिवसेंदिवस वाढत असल्याने ही महामारी आटोक्यात आणणे आरोग्य कर्मचाऱ्यांना तारेवरची कसरत करत आहे. लसीकरण करणे, कोरोना टेस्ट करणे, सर्व्हे करणे, बाधित रुग्णांवर प्राथमिक उपचार करणे, त्यांना मोठ्या रुग्णालयात रवाना करणे, विलगीकरण कक्षात दाखल करणे एवढ्या कामाचा भार वाढलेला असताना जिल्हा परिषद प्रशासनाचे या भागाकडे दुर्लक्ष झाल्याने आश्चर्य व संताप व्यक्त होत आहे. जिल्हाधिकाऱ्यांनी गांभीर्याने दखल घेऊन जिल्हा परिषद प्रशासनाला येथील रिक्त जागा तातडीने भरण्यासंबंधी आदेशित करावे अशी मागणी नागरिकांनी केली.