नवापुरातील ते दारू दुकान अखेर केले ‘सील’

नवापूर शहरात रमजान ईद व अक्षय तृतीय दिवशी गांधी पुतळ्याजवळील एमडी वाइन शॉप सुरू असल्याचा व्हिडीओ भाजप तालुकाध्यक्ष भरत माणिकराव गावीत यांनी व्हायरल केल्याने सोशल मीडियावर चांगला गाजला. त्या अनुषंगाने आज राज्य उत्पादन शुल्क विभागाच्या अधिकाऱ्याने वाइन शॉपवर तपासणी केली असता, वाइन शॉपचे रजिस्टर आढळून न आल्याने, तसेच मद्यविक्री करीत असल्याचे दिसून आल्याने वाइन शॉप जिल्हाधिकाऱ्यांचा पुढील आदेश येईपर्यंत सील करण्यात आले आहे. याप्रसंगी नवापूर पोलीस ठाण्याचे पोलीस निरीक्षक बाळासाहेब भापकर नगरपालिकेचे मुख्याधिकारी महेश चौधरी उपस्थित होते.

एमडी वाइन शॉपचे संचालक बडोगे यांना या संदर्भात विचारणा केली असता, त्यांनी सांगितले की, जिल्हाधिकाऱ्यांनी वाइन शॉपला होम डिलिव्हरी सुविधा देण्याचे आदेश दिले आहे. सकाळी सात वाजेपासून संध्याकाळी सहा वाजेपर्यंत पार्सल देण्याची मुभा देण्यात आलेली आहे. त्या अनुषंगाने आम्ही मुख्य शटर बंद करून लहान शटर उघडे करून पार्सल देत होतो, त्या दरम्यान हा व्हिडीओ करण्यात आला आहे.

ही कारवाई नंदुरबार राज्य उत्पादन शुल्क विभागाचे अधीक्षक युवराज राठोड यांच्या मार्गदर्शनाखाली निरिक्षक शैलेंद्र मराठे, बी.बी सूर्यवंशी, मनोज संबोधी, जमादार हितेश जेठे, हंसराज चौधरी, रामसिंग राजपुत, मानसिंग पाडवी यांनी केली.