लर्निंग लायसन्स ऑफलाइनच बरे; कार्यालयात पुन्हा गर्दी

नंदुरबार : परिवहन विभागाने घरबसल्या लर्निंग लायसन अर्थात शिकाऊ वाहन परवाना काढण्याची सुविधा उपलब्ध करून देण्यासह वितरक स्तरावरच वाहनांना क्रमांक देण्याचा निर्णय घेतला आहे. यातील लर्निंग लायसन्सचा निर्णय चांगला असला तरी तांत्रिक अडचणींमुळे अर्जदार हैराण होऊन ऑनलाइन नको ऑफलाइनच बरे, असे सांगून आरटीओ कार्यालयात धाव घेत आहेत.

केंद्र शासनाने आदेश काढून आधारचा वापर करून फेसलेस सेवेचा लाभ घेण्याची तरतूद केली आहे. यानुसार वाहन व सारथी ४.० प्रणालीमध्ये आवश्यक ते बदल केलेले आहेत. यामुळे आरटीओ कार्यालयात न जाता घरूनच ऑनलाइन परीक्षा देऊन लर्निंग लायसन्स काढणे व वाहन वितरकांच्या स्तरावरच वाहन क्रमांक जारी करण्याचा निर्णय घेतला आहे. यातून ऑनलाइन परीक्षा देऊन लर्निंग लायसन्स काढणे या निर्णयाची अंमलबजावणी होऊ लागली आहे. मात्र, हा निर्णय अर्जदारांसाठी त्रासदायक ठरत आहे. यामुळे अनेक जण प्रत्यक्ष कार्यालयात जात आहेत. नंदुरबार उपप्रादेशिक परिवहन कार्यालयात आधीच कर्मचारी संख्या कमी असल्याने अनेकांची कामे योग्य वेळी होत नसल्याचा दावा केला जात आहे. कोरोनामुळे लायसन्स काढणे अत्यंत जिकिरीचे झाल्याचा अनुभव येथे येणाऱ्यांना येत असून कारवाईला गती देण्याची अपेक्षा नागरिकांकडून व्यक्त करण्यात येत आहे.

ऑनलाइनसाठी अडचणी काय?

आरटीओ कार्यालयाने अर्ज करणाऱ्यांसाठी सर्व पर्याय खुले ठेवण्यात आले आहेत. असे असताना ऑनलाइन अर्जास अडचणी येत आहेत.

नाव, जन्मतारीख टाकल्यानंतर फोटो अपलोड होत नाहीत. एकाच वेळी सर्व्हरवर लोड येत असल्याने साइट बंद पडते, असे सांगितले जात आहे. त्यामुळे अनेक जण आरटीओ कार्यालयात येऊन एजंटच्या माध्यमातून अर्ज करून भरून घेत आहेत. सातपुड्यातील धडगाव व अक्कलकुवा तालुक्यातून ऑनलाइन अर्ज करणे शक्यच नसल्याने तेथील नागरिक ऑफलाइन कामांसाठी येत आहेत. दरम्यान लायसन्ससाठीचे कॅम्पही कोरोनामुळे बंद करण्यात आले असल्याने नागरिकांना प्रवास करून नंदुरबार गाठावे लागते.

ऑनलाइनच होत नसल्याने परीक्षा रखडल्या

नंदुरबार जिल्ह्यातील नेटवर्क कनेक्टिव्हिटी या उपक्रमाच्या मुळावर उठली आहे. नेट चालत नसल्याने ऑनलाइन नकोच असा पवित्रा नागरिक घेत आहेत. यातून एजंटसोबत संपर्क करून कामकाज केले जात आहे. दरम्यान ज्यांनी ऑनलाइन पद्धतीने अर्ज केले त्या सर्वांनीच ऑनलाइन पद्धतीने परीक्षा दिली नसावी, असा अंदाज आहे. अर्ज करणारा दुसरा अन् परीक्षा देणारा दुसरा अशी स्थिती असल्याचे समोर आले होते. यामुळे ऑफलाइन कामकाजास प्राधान्य दिले जात असल्याची माहिती समोर आली आहे.

अधिकारी अद्यापही सुटीवरच...

नंदुरबार येथील उपप्रादेशिक परिवहन कार्यालय सध्या विविध कारणांमुळे चर्चेत आहे. उपप्रादेशिक परिवहन अधिकारी नानासाहेब बच्छाव हे सध्या रजेवर असल्याने पदभार उपप्रादेशिक परिवहन अधिकारी उत्तम जाधव यांना पदभार देण्यात आला आहे. प्रभारीराजमुळे कार्यालयातील कामकाज हे मंदावले असल्याचे दिसून आले आहे.

९५ ऑनलाइन लायसन्स

जिल्ह्यात आतापर्यंत फक्त ९५ जणांनी ऑनलाइन लर्निंग लायसन काढले आहेत. यासाठी त्यांनी ऑनलाइन पद्धतीने अर्ज करून लायसन मिळवले आहेत.

गेल्या महिन्यात ही सुविधा शासनाने सुरू केली. बायोमेट्रिक तसेच सर्व्हरमध्ये अडचणी येणे, अशा तांत्रिक अडचणीमुळे ऑनलाइन लायसन्स निघू शकत नसल्याची माहिती दिली जात आहे.

ऑनलाइन लायसन्सची सुविधा शासनाने उपलब्ध करून दिली असली तरी दुर्गम भागात ही सुविधा काम करत नाही. म्हणून वेळोवेळी धडगाव ते नंदुरबार अशा चकरा मारत आहे. लर्निंग झाले आहे आता परमनंट लायसन्सची प्रतीक्षा आहे.

- राकेश पावरा, लायसन्सधारक

ऑनलाइनपेक्षा ऑफलाइन काम होत असल्याने लायसनसाठी अर्ज केला आहे. तळोदा तालुक्यातही कधी कधी नेट चालत नसल्याने ऑनलाइन पद्धतीने अर्ज करणे शक्य होत नाही. शासनाने आधी नेटची सुविधा बळकट करण्याची गरज आहे.

-विशाल पाडवी, लायसन्सधारक