हिवताप प्रतिरोध महिना उपक्रमाचा सोमावल येथे शुभारंभ

या उपक्रमांतर्गत पावसाळ्यात उत्पन्न होणाऱ्या विविध कीटकजन्य रोगांची माहिती, आजारांची लक्षणे, घ्यावयाची काळजी, प्रतिबंधक उपाय व मार्गदर्शक सूचना आदींची माहिती नागरिकांना व्हावी, यासाठी जनजागृती मोहीम हाती घेण्यात आली आहे. या मोहिमेत हिवताप, डेंग्यू, चिकुनगुनिया रुग्णांच्या संख्येत वाढ झालेल्या कार्यक्षेत्रावर विशेष लक्ष असणार आहे. जागतिक महामारी ठरलेल्या कोरोना संसर्ग उद्रेकाच्या वेळी ग्रामीण भागात जी परिस्थिती ओढावली गेली त्याची पार्श्वभूमी लक्षात घेता, बहुतांश कीटकजन्य आजारांची लक्षणे व करोना आजारांची लक्षणे मिळतीजुळती असल्याने, नागरिकांमध्ये संभ्रमावस्था निर्माण होऊ नये, यासाठी तळोदा तालुक्यातील सोमावल प्राथमिक आरोग्य केंद्राच्या कर्मचारी व डॉक्टरांनी पुढाकार घेतला आहे. एनव्हीडीसीपी दिल्ली, आरोग्यसेवा (हिवताप) विभाग नाशिक व जिल्हा हिवताप कार्यक्रम नंदुरबार यांच्या मार्गदर्शक सूचनानुसार ‘हिवताप प्रतिरोध महिना’ उपक्रम राबविण्यात सुरुवात झाली आहे. या उपक्रमांतर्गत मार्गदर्शक सूचनांनुसार कोरोना संशयित तापाचे रुग्णांचे गावपातळीवर आशा कार्यकर्ती, आरोग्यसेवक यांच्यामार्फत नियमितपणे हिवतापासाठी रक्त नमुने गोळा करणे, डेंग्यू, चिकुनगुनिया तपासणीसाठी प्राथमिक आरोग्य केंद्र तालुकास्तरावरील आरोग्य यंत्रणेकडे रक्तजल नमुने तपासणीसाठी पाठविणे, दूषित रक्त नमुने रक्तजल नमुने आढळून आल्यास, राष्ट्रीय उपचार धोरणानुसार संबंधित रुग्णांना उपचार देणे आवश्यक असल्यास, टेलिमेडिसीनचा वापर वेळोवेळी करणे, उद्रेकग्रस्त भागात नियमित कीटकनाशक फवारणी व कीटकनाशक भारित मच्छरदाणीचे वाटप करणे, कीटकजन्य आजाराविषयी जनजागरण मोहिमेत पथनाट्य व भित्तीपत्रके लावणे आदींविषयी प्रतिबंधात्मक कार्यवाहीची अंमलबजावणी करणार आहेत.

सोमावल येथे या उपक्रमांतर्गत झालेल्या कार्यक्रमात वैद्यकीय अधिकारी डॉ.सुधीर ठाकरे, डॉ.हरीश वसावे, मानसेवी वैद्यकीय अधिकारी डॉ.छाया पाडवी, के.एस. कुवर, सामुदायिक आरोग्य अधिकारी भावना ढोलार, हर्षदा चौधरी, आरोग्य सहायिका ए.व्ही. कुवर, आरोग्य सहायक एस.ए. ठाकरे, आर.डी. आगळे, आरोग्यसेविका मनीषा पावरा, गीता पाडवी, जयश्री वसावे, मनीषा साळवे, करण पाडवी आदी उपस्थित होते. यावेळी उपस्थित नागरिकांना एस.ए. ठाकरे यांनी जनजागृती पत्रक वाटप करून माहिती दिली.