किराणा दुकानाबाहेरील ६७ हजार रुपयांचे खाद्य तेल चोरट्यांकडून लंपास

नंदुरबार : दुकानाबाहेर ठेवलेल्या ५४० किलो खाद्य तेल भरलेल्या टाक्या चोरट्यांनी लंपास केल्याची घटना ब्राम्हणपुरी, ता.शहादा येथे घडली. तब्बल ६७ हजार ५०० रुपये किमतीचे तेल होते. याबाबत शहादा पोलीस ठाण्यात गुन्हा दाखल करण्यात आला.

पोलीस सूत्रांनुसार, ब्राम्हणपुरी येथे रोनक पारसमल जैन यांचे माहेश्वरी ट्रेडर्स, समता प्रोव्हिजन व राकेश किराणा दुकान आहे. या दुकानांच्या बाहेर खाद्य सोयातेल टाक्यांमध्ये भरून ठेवले होते. जवळपास ५४० किलो तेल टाक्यांमध्ये होते. १४ ते १५ फेब्रुवारी दरम्यान चोरट्यांनी रात्रीच्या वेळी सर्व तेल लंपास केले. त्याची किंमत ६७ हजार ५०० रुपये इतकी आहे. १५ रोजी सकाळी ही चोरी उघडकीस आली. रोनक जैन यांनी ठिकठिकाणी तपास केला असता याबाबत काहीही माहिती मिळाली नाही. त्यामुळे त्यांनी शहादा पोलीस ठाण्यात फिर्याद दाखल केली. त्यांच्या फिर्यादीवरून चोरीचा गुन्हा दाखल करण्यात आला. तपास पोलीस नाईक वळवी करीत आहे.

दरम्यान, एवढ्या मोठ्या प्रमाणात तेल चोरी करतांना तीन ते चार जणांचा त्यात समावेश असू शकतो. शिवाय यासाठी मोठ्या वाहनाचा देखील वापर केला गेला असेल, अशी शक्यता आहे. त्यामुळे पोलिसांनी त्यादृष्टीने तपासाला गती दिली आहे.