खैरवे-भडगाव येथे ४३ जण पाॅझिटिव्ह

ग्रामपंचायत व आरोग्य विभागाने पथक दाखल करून उपाययोजना सुरू केल्या असून, खैरवे व भडगाव ही दोन्ही गावे प्रतिबंधित क्षेत्र म्हणून घोषित केले आहेत. संपूर्ण गाव बॅरेकेड लावून बंद करण्यात आले आहे. ग्रामस्थांनी घाबरून न जाता आपले आरोग्य आपण सांभाळा, शासनाच्या नियमावलीचे पालन करा, असे आवाहन प्रशासन व पं.स. सदस्या चंदनबाई पानपाटील यांनी केले आहे. खैरवे व भडगाव या छोट्याशा गावांमध्येही कोरोनाने रौद्ररूप धारण करीत प्रवेश केला आहे. त्यात ४३ लोकांना कोरोनाचा संसर्ग झाल्याचा अहवाल प्राप्त होताच आरोग्य विभागातर्फे घरोघरी जाऊन सर्वेक्षण करून औषधोपचार करण्यात येत आहेत. सौम्य लक्षणे असणाऱ्या लोकांचे घरातच विलगीकरण करण्यात आले असून, काही लोकांना शहादा व नंदुरबार येथील कोविड सेंटरला पाठविण्यात आले आहे. गावात औषध फवारणी करण्यात आली असून, प्रत्येकाने तोंडाला मास्क, वेळोवेळी हात धुणे, गर्दी न करणे, असे निर्बंध लावले आहेत. या सर्व परिस्थितीवर सरपंच शारदाबाई निकुंबे, उपसरपंच रमणबाई गिरासे, पोलीस निरीक्षक राजेश शिरसाठ, ग्रामसेविका कल्पना धनगर, आरोग्य सेविका अलका मराठे, आरोग्य सहायक परदेशी, पोलीस पाटील धनराज पानपाटील, मंडळ अधिकारी विजय साळवे, तलाठी महेश ठाकरे, नितेश मोरे, ग्रामपंचायतीचे सदस्य राजेंद्र पानपाटील आदी परिस्थितीवर लक्ष ठेवून आहेत.

माझे पती व मी कोरोना पॉझिटिव्ह आलो आहोत. उर्वरित ग्रामस्थांनी गावातच गुरुवारी शिबिर घेऊन रॅपिड अँटिजन टेस्ट करून घ्यावी, जेणेकरून आरोग्य विभागाला औषधोपचार करण्यास मदत होईल व गाव कोरोनामुक्त करू. ग्रामस्थांनी भीती बाळगू नये, प्रशासनास सहकार्य करावे.

-चंदनबाई पानपाटील, पं.स. सदस्या, खैरवे-भडगाव, ता.शहादा.

संपूर्ण गावात निर्जंतुकीकरण फवारणी करण्यात आली आहे व तीन दिवस गाव पूर्णतः बंद करण्यात आले आहे. गावात बॅरेकेड लावून कंटेन्मेंट झोन म्हणून घोषित करण्यात आले असले तरी ग्रामस्थांनी कोणतीही भीती न बाळगता स्वतःची काळजी घ्यावी.

-कल्पना धनगर, ग्रामसेविका, खैरवे-भडगाव, ता.शहादा.