बाईक ॲम्ब्युलन्सचा प्रवास खडतरच!

नंदुरबार : ४० दिवसांपूर्वी सेवेत दाखल झालेल्या दहा बाईक ॲब्युलन्समधून आतापर्यंत २५ पेक्षा अधिक रुग्ण जवळच्या आरोग्य केंद्रात नेण्यात आले आहेत. त्यात प्रसूतीसाठीच्या महिला आणि सर्पदंश झालेल्या रुग्णांचा अधिक समावेश आहे. सातपुड्यातील पायवाट आणि ओबडधोबड रस्त्यांवरून चालवतांना मात्र रुग्णाला त्रास सहन करावा लागत असल्याचे चित्र आहे. दरम्यान, ॲब्युलन्स दिल्या असल्या तरी चालकांना पेट्रोलसाठी ना पैसे दिले ना लॅागबुक दिले गेले आहे.

जिल्ह्यातील धडगाव व अक्कलकुवा तालुक्यतील सातपुड्यातील गाव, पाड्यांमधील भौगोलिक रचना लक्षात घेता रुग्णांना नेण्यासाठी मोठी कसरत करावी लागते. त्यासाठी झोळीचा अर्थात स्थानिक भाषेत ‘बांबूलन्स’चा आधार घ्याव लागतो. त्यावर उपाय म्हणून देशातील ईशान्येकडील राज्याच्या धर्तीवर ‘बाईक ॲम्ब्युलन्स’चा प्रयोग करण्यात येत आहे. ४० दिवसांपूर्वी १० बाईक ॲम्ब्युलन्स सेवेत दाखल झाल्या आहेत.

या बाईक ॲम्ब्युलन्ससाठी एकूण ६६ लाख रुपये खर्च करण्यात येत आहे. त्यात दोन वर्षांसाठी देखभाल व दुरुस्ती, चालकाचे मानधन, इंधन व प्रशिक्षण आदी खर्चाचा समावेश आहे. निती आयोगाच्या माध्यमातून हा निधी उपलब्ध करून देण्यात आला आहे.

१० आरोग्य केंद्राअंतर्गत ७२ गावे

बाईक ॲम्ब्युलन्स दहा आरोग्य केंद्रांअंतर्गत देण्यात आल्या आहेत. साधारण ७२ गावांना त्या सेवा पुरविणार आहेत. राजबर्डी केंद्राअंतर्गत त्रिशुल येथे ॲम्ब्युलन्स राहत असून त्या अंतर्गत राजबर्डी, कामोद, खर्डी, कुकलट, शेलकुवी, चिकल्टी, शिंदवाणी, कुवरखेत, जामण्याखेत व कात्रा ही गावे आहेत.

तेलखेडी केंद्राअंतर्गत वेलखेडी येथे ॲम्ब्युलन्स उभी राहते. या अंतर्गत सिपाणपाडा, सेलबारे, जुगणी, पेचरीपाडा, पिपलपाडा, सिपाणबारीपाडा, तेलखेडी महाराज, मोजरा, मोडलगाव ही गावे आहेत.

झापी आरोग्य केंद्राअंतर्गत सिंदी येथे ॲम्ब्युलन्स राहते. यात झापी, खडकी, मांजणी, तोरणमाळ, फलई, सिंदीदिगर, भाबरी, उडद्या, कुंड्या, मुरवाणी व सावऱ्यालेकडा ही गावे आहेत.

रोषमाळ बुद्रूक आरोग्य केंद्रात शेलगदा येथे ॲम्ब्युलन्स राहते. आकवाणी, कुकतार, कुंभरी, बिलायापाडा, नलगव्हाण, गुराडी, पिपरापाणी, शेलगदा, अठ्ठी ही गावे येतात.

कात्री केंद्राअंतर्गत माकडकुंड येथे ॲम्ब्युलन्स उभी राहते. या अंतर्गत कात्री व परिसर आहे.

मांडवा आरोग्य केंद्राअंतर्गत डेब्रामाळ येथे ॲम्ब्युलन्स राहते. मांडवी बुद्रूक, मांडवी खुर्द, खडक्या, मोवडाबीपाडा, रूईमालपाडा, बादरपाडा, बेबडदा, कलमसपाडे, डसपिड्यापाडा, गुगलमाल ही गावे आहेत.

डाब आरोग्य केंद्राअंतर्गत वालंबा येथे ॲम्ब्युलन्स असते. असली, पाटबारा, गदवानी व मेवड ही गावे आहेत.

काठी आरोग्य केंद्राअंतर्गत वणवाईपाडा येथे ॲम्ब्युलन्स उभी असते. जमाना, केलवाणी, वाहवाणी, नोलदा, ओटवी, ओंडवा, पौला, माकडकुंड ही गावे येतात.

पिंपळखुटा आरोग्य केंद्राअंतर्गत बालापाट येथे ॲम्ब्युलन्स उभी असते. या अंतर्गत सुरगस, जुगलखेत, बालाघाट, बर्डी, वेहगी, खोडसबार, बारीसुरगस, तोलवापाडा ही गावे येतात. तर जांगठी आरोग्य केंद्राअंतर्गत गमन येथे ॲम्ब्युलन्स उभी राहत असून वडफळी व परिसरात सेवा देते.