फरशी पुलावर बाहेर निघालेली लोखंडी सळई ठरतेय धोकेदायक

लोकमत न्यूज नेटवर्क
प्रकाशा : शहादा तालुक्यातील प्रकाशा येथील तापी नदीवरील पूल ते केदारेश्वर मंदिर यादरम्यान फरशीचे काम करण्यात आले आहे. मात्र या फरशी पुलावरील लोखंडी सळई बाहेर आल्याने अपघाताला आमंत्रण देत आहे. याठिकाणी दुरुस्ती करण्याची मागणी वाहनधारकांकडून होत आहे.
प्रकाशा ते तोरणमाळ या रस्त्याचे काम टप्प्याटप्प्याने सुरू आहे. काही ठिकाणी फरशी पुलांचे काम झाले आहे. काही ठिकाणी गटारी व रस्त्याच्या आजूबाजूला भरावाचे काम सुरू आहे. मात्र काही महिन्यांपूर्वीच प्रकाशा येथील तापी नदीवरील पूल ते केदारेश्वर मंदिर यादरम्यान दोन ठिकाणी फरशी पुलाचे बांधकाम करण्यात आले आहे. या फरशीवरील लोखंडी सळई बाहेर आली आहे. वाहनधारकांना लांबवरुन ही सळई दिसत नाही. जवळ आल्यानंतर ती दुचाकीच्या टायरमध्ये लटकते व त्यामुळे अपघात होत आहेत. दोन दिवसांपूर्वी शिंदे येथील एक दाम्पत्य मोटारसायकलीने जात असताना याच सळईमध्ये त्यांच्या दुचाकीचे चाक अडकल्याने ते खाली पडले. समोरून येणाऱ्या वाहनातील प्रकाशा येथील ग्रा.पं. सदस्य दिलीप ज्ञानदेव पाटील, दुर्गेश पाटील, विजू पाटील यांनी त्यांना उचलून प्रकाशा येथील प्राथमिक आरोग्य केंद्रामध्ये आणले होते. त्यांच्यावर वेळीच उपचार झाल्याने पुढील अनर्थ टळला. संबंधित बांधकाम विभाग व ठेकेदाराने या फरशीवरील बाहेर निघालेली सळई काढून संभाव्य दुर्घटना टाळावी, अशी मागणी वाहनधारकांकडून होत आहे.