बंगालमध्ये जाणाऱ्या ४४ मजूरांची तपासणी

लोकमत न्यूज नेटवर्क
तळोदा : गुजरातधील अहमदाबाद येथून पश्चिम बंगालमध्ये जाणाºया ४४ कामगारांची आमलाड ता़ तळोदा येथे आरोग्य तपासणी करण्यात आली़ या मजूरांना अक्कलकुवा आगाराच्या बसेसद्वारे गोंदियापर्यंत पाठवण्यात आले आहे़
पश्चिम बंगालमधील ४४ कामगार लॉकडाऊनमुळे अडकून पडले होते़ त्यांनी गुजरात सरकारला विनंती केल्यानंतर त्यांना दोन बसेसद्वारे महाराष्ट्र हद्दीत अक्कलकुवा शहरापर्यंत सोडण्यात आले होते़ तेथून या ४४ जणांची आमलाड येथे रवानगी करण्यात आली होती़ याठिकाणी तालुका वैद्यकीय अधिकारी डॉ़ महेंंद्र चव्हाण, डॉ़ व्ही़एच़राणे, आरोग्य सेविका स्रेहल सोनवणे यांच्यासह आरोग्य कर्मचाऱ्यांनी तपासणी केली़यावेळी एकाही मजूरामध्ये कोरोनाची लक्षणे आढळून आली नाहीत़
सर्व ४४ मजूरांना गोंदिया जिल्ह्यालगत छत्तीसगढ हद्दीपर्यंत सोडण्यात येणार आहे़ यासाठी अक्कलकुवा आगाराच्या बसेस पाठवण्यात आल्या आहेत़ तत्पूर्वी या मजूरांना चहा, नाश्ता आदीे देण्यात आले़ तहसीलदार पंकज लोखंडे, अक्कलकुवा आगार व्यवस्थापक रितेश फुलपगारे यांच्यासह अधिकारी व कर्मचारी उपस्थित होते़

गुजरात राज्यातील विविध कारखान्यात काम करणाºया मजूरांची उपासमार होत असल्याने त्यांना रवाना करण्यात आले होते़ तेथेही त्यांची संपूर्ण स्क्रिनिंग करण्यात आली होती़ येथे आल्यानंतरही या मजूरांची स्क्रिनिंग करण्यात आली़ आमलाड येथील कक्षात आणल्या गेलेल्या सर्वच ४४ कामगारांची योग्य ती विचारपूस करण्यात आली़ डॉ़ चव्हाण यांच्या मार्गदर्शनात तपासणीनंतर रवाना करण्यात आलेल्या मजूरांना काही अडचण आल्यास गरजेची औषधी देण्यात येऊन स्वच्छता ठेवण्याबाबत मार्गदर्शन करण्यात आले़