तीन सीट मोटारसायकलस्वारांवर कडक कारवाईचे निर्देश

तळोदा : तालुक्यातील बोरद रस्त्यावर बुधवारी झालेल्या मोटारसायकलिंगच्या भीषण अपघात स्थळी जिल्हा पोलीस अधीक्षक महेंद्र पंडित यांनी भेट देऊन घटनेची पाहणी केली. या घटनेत पाच जण मृत्युमुखी पडले होते. या वेळी त्यांनी तीन सीट मोटारसायकलचालकांवर कडक कार्यवाही करण्याचे निर्देश पोलीस निरीक्षक पंडित सोनवणे यांना दिलेत.

त्यांच्यासोबत पोलीस उपअधीक्षक श्रीकांत घुमरे उपस्थित होते. पोलीस अधीक्षक पंडित यांनी अवैध वाहतूक, तीन सीट मोटारसायकलस्वार व बुलेट मोटारसायकलच्या कर्कश आवाजावर गांभीर्याने कार्यवाही करण्याची सूचना स्थानिक पोलीस ठाण्यास दिलेत. कारण सुसाट व तीन सीट मोटारसायकल स्वार ही तालुक्यातील मोठी समस्या आहे. यामुळेच असे अपघात होत आहेत, असे मत त्यांनी पत्रकारांजवळ बोलताना व्यक्त केले. तालुक्यात १८ वर्षांखालील, विनापरवाना मोटारसायकलस्वार, धूम स्टाईल मोटारसायकल चालविणाऱ्यांचे प्रमाणदेखील वाढले आहे. त्यांच्यावर कारवाई होत नसल्यामुळे हा प्रकार वाढला आहे. त्यामुळे अशा टारगट मोटारसायकलस्वारांना सर्वच नागरिक वैतागले आहेत. यावर पोलिसांकडून कडक कार्यवाही करण्याची अपेक्षा व्यक्त करण्यात येत आहे.

अनेक दिवसांपासून पोलीस कर्मचारी वसाहतींचा प्रश्न रखडलेला

पोलीस कर्मचाऱ्यांच्या वसाहतीचा प्रश्न अनेक दिवसांपासून रखडलेला आहे. परिणामी पोलीस कर्मचारी पडक्या इमारतीत आपला जीव मुठीत घेऊन नाइलाजास्तव वास्तव्य करीत आहेत. याबाबत पोलीस अधीक्षकांनी महाराष्ट्र पोलीस गृह निर्माण खात्याकडे तळोदा पोलीस वसाहतीच्या बांधकामाचा प्रस्ताव पाठविला आहे. त्यावर कार्यवाहीदेखील सुरू आहे. त्यामुळे लवकरच पोलीस वसाहतीचा प्रश्न मार्गी लागणार असल्याचे त्यांनी सांगितले.

पोलीस ठाण्याची पाहणी

या भेटीदरम्यान त्यांनी तळोदा पोलीस ठाण्याची संपूर्ण पाहणी केली. त्यांना पोलीस ठाण्यातील स्वच्छतागृह पाण्याअभावी बंद असल्याचे निदर्शनास आले. तसेच पोलीस ठाण्याच्या खिडक्यांच्या कांचा तुटलेल्या आढळल्यात. याबाबत त्यांनी नाराजी व्यक्त करून दुरुस्ती करण्याची सूचना दिली.

पोलीस स्टेशन हे मध्यवर्ती प्रशासकीय इमारतीत आहे

पोलीस ठाण्याला स्वतंत्र इमारत असणे आवश्यक आहे. याबाबत जुन्या कुटीर रुग्णालयाच्या व सध्या कोर्ट असलेल्या इमारतीत स्थलांतरित करण्यात येणार आहे. त्यामुळे पोलिसांना विनाअडथळा व गतिमानतेने आपले कामकाज करता येईल. या नवीन इमारतीत पोलिसांना आपली वाहने व जप्त करून कार्यवाही केलेली वाहनांना पुरेशी जागा उपलब्ध होणार आहे. परिणामतः स्वतंत्र पोलीस ठाण्याचा प्रश्न लवकरच सुटेल, असा आशावाददेखील त्यांनी बोलून दाखविला.