प्राथमिक आरोग्य केंद्रांमध्ये वाढली गर्दी

योग्य दर्जाचे गतिरोधक टाकावेत

नंदुरबार : तळोदा ते अक्कलकुवा दरम्यान रस्ता दुरुस्ती करून देण्यात आली आहे. यातून वाहनांचा वेग नियंत्रित करण्यासाठी गतिरोधक टाकण्यात आले आहेत. परंतु हे गतिरोधक कमी-अधिक उंचीचे असल्याने त्यावर धडकून वाहनांचे अपघात होत आहेत.

तळोदा ते आमलाड दरम्यान खड्डेच खड्डे

नंदुरबार : तळोदा तालुक्यातील आमलाडा ते तळोदा शहर या अंतरात पडलेले खड्डे वाहनधारकांसाठी त्रासदायक ठरत आहेत. खड्डे दुरुस्त व्हावेत तसेच आमलाड पुलावर योग्य तो भराव करून पूल दुरुस्त व्हावा अशी मागणी नागरिकांकडून सातत्याने करण्यात येत आहे. गुजरात हद्दीपर्यंतच्या खराब अशा रस्त्यामुळे सर्वच वाहनांना अडचण येत असून बऱ्हाणपूर-अंकलेश्वर महामार्गावरील महत्त्वाचे अंतर असतानाही याकडे दुर्लक्ष होत आहे.

ग्रामीण भागात स्वच्छता मोहीम हवी

बाेरद : तळोदा तालुक्याच्या ग्रामीण भागात स्वच्छता मोहीम राबवण्याची मागणी आहे. पाऊस पडून गेल्याने गटारी व सांडपाणी यामुळे रोगराईचा धोका आहे. प्रशासनाने याबाबत सूचना करत मोहीम राबवून ग्रामीण भागातील जनतेला दिलासा द्यावा, अशी अपेक्षा आहे.

हळदाणी परिसरात शेतीकामांना वेग

हळदाणी : नवापूर तालुक्यातील हळदाणी परिसरात पावसाने हजेरी लावल्याने शेतीकामांना वेग आला आहे. विसरवाडी व हळदाणी परिसरात तूर, भात लागवड तसेच कापूस लागवडीवर शेतकरी भर देत असून त्यानुसार कामे सुरू असल्याचे चित्र आहे.

विजेचा लपंडाव थांबवण्याची अपेक्षा

अक्कलकुवा : शहरातील विविध भागात दर दिवशी विजेचा लपंडाव सुरू आहे. यातून नागरिक त्रस्त आहेत. कंपनीकडून याबाबत कामकाज करण्यात येत असल्याचे सांगण्यात येत असले तरीही वीजपुरवठा खंडित होण्याचे प्रमाण वाढत असल्याने नाराजी व्यक्त करण्यात येत आहे. प्रशासनाने याकडे गांभिर्याने लक्ष देऊन शहरातील नादुरुस्त ट्रान्सफाॅर्मर काढून नवीन द्यावेत, अशी मागणी करण्यात आली आहे.

दूषित पाण्यामुळे ग्रामीण भागात चिंता

नंदुरबार : अक्कलकुवा तालुक्यातील विविध भागात ग्रामपंचायतींकडून पुरवठा केले जाणारे पाणी हे दूषित असून यामुळे नागरिकांना जलजन्य आजार होण्याची शक्यता आहे. दूषित अशा पाण्यावर प्रक्रिया करण्याची अपेक्षा व्यक्त होत आहे.

मोकाट श्वानांचा बंदोबस्त करावा

नंदुरबार : शहरालगतच्या विविध वसाहतींमध्ये मोकाट श्वानांचा संचार नागरिकांसाठी धोकेदायक ठरत आहे. या श्वानांचा बंदोबस्त करण्यात यावा अशी मागणी नागरिकांकडून करण्यात येत आहे. वाघोदा, पातोंडा व होळ तर्फे हवेली शिवारात श्वानांचा संचार वाढला आहे.

लूपिन फाउंडेशनकडून लसीकरण जनजागृती

नंदुरबार : लुपिन ह्युमन वेल्फेअर आणि रिसर्च फाउंडेशनतर्फे कोविड लसीकरण जनजागृती करण्यात येत आहे. यांतर्गत जिल्ह्यात २०० गावांमध्ये हा उपक्रम राबवण्यात येत आहे. या उपक्रमाचे जिल्हाधिकारी मनीषा खत्री यांच्याहस्ते नुकतेच उद‌्घाटन करण्यात आले.

सातपुड्यात गावोगावी वागदेव पूजन उपक्रम

धडगाव : सातपुड्यात गाव पाड्यांवर सध्या वाघदेव व इतर निसर्ग देवतांंचे पूजन सुरू आहे. यासाठी संपूर्ण गाव एकत्र येत निसर्गाचे आभार मानत असल्याचे दिसून येत आहे. धडगाव तालुक्यातील विविध भागात सध्या वाघदेव पूजन करून एकत्रित नैवेद्य दिला जात आहे.