शासकीय रुग्णालयात खाटा वाढल्याने मातांची झाली सोय

सोयी सुविधा वाढल्याने दर दिवशी जिल्हा रुग्णालयात ५० च्या जवळपास मातांना दाखल करून त्यांची प्रसूती करण्यात येत आहे. सिझर आणि नाॅर्मल पद्धतीने होणाऱ्या या प्रसूतीसोबतच नवजात अर्भकांसाठी शीतपेट्या व आयसीयू तयार करण्यात आल्या असल्याने दरदिवशी येथे प्रसूतीसाठी येणाऱ्या मातांची संख्या वाढती आहे. यामुळे प्रशासनाकडून तीन वेगवेगळे वाॅर्ड तयार करून मातांची सोय करण्यात आली आहे. या वाॅर्डांमध्ये तपासणी केली असता, स्वच्छता आणि टापटीप दिसून आली. मातांना बाळांना स्तनपान करण्यासाठी स्वतंत्र कक्षही तयार करण्यात आला आहे. जिल्हा रुग्णालयातील तीनही वाॅर्डमध्ये भंडारा येथील दुर्दैवी घटनेनंतर दक्षता घेतली जात असल्याचे दिसून आले. कक्षातच तीन परिचारिका ह्या कायम नियुक्त तर त्यापेक्षा अधिक परिचारिका ह्या तपासणीसाठी सज्ज असल्याचे दिसून आले. वेळोवेळी याठिकाणी वैद्यकीय अधिकारी, स्त्री रोग तज्ञ व बालरोग तज्ञ हे भेटी देत असल्याचे सांगण्यात आले.

याठिकाणी दाखल असलेल्या नाॅर्मल डिलिव्हरीतील वाॅर्डात देण्यात आलेल्या चादरी गाद्यांबाबत काहीशी नाराजी व्यक्त करण्यात आली. रुग्णालयातील प्रसूती कक्षात सर्वप्रकारच्या सुविधा देण्यात आल्या आहेत. या सुविधांमुळे याठिकाणी रात्री-अपरात्री मातेला दाखल केल्यास वेळेवर प्रसूती व्हावी यासाठी आठ टेबल तयार करण्यात आले आहेत. याठिकाणी मातांना योग्य पद्धतीने सुविधा दिल्या जात आहेत. व्हीलचेअर, स्ट्रेचर याबाबत मात्र अद्यापही योग्य ती कार्यवाही झालेली नाही.

दुर्गम भागातून याठिकाणी आणले गेल्यानंतर काही वेळात माझ्या मुलीने बाळाला जन्म दिला. सर्व सोयी असल्याने अडचणी आल्या नाहीत. सर्व प्रकारे सोयी दिल्या. डाॅक्टरांनी मार्गदर्शन केले.

-कमलबाई वळवी, डिस्चार्ज दिलेल्या मातेच्या आई

जिल्हा रुग्णालयात दाखल झाल्यानंतर भीती होती. प्रथम बाळंतपण असल्याने अनेक बाबींचे मार्गदर्शन नव्हते. येथे आल्यानंतर माहिती दिली गेली. बेडही उपलब्ध करून देण्यात आला.

-प्रसूती झालेली माता,

सद्या उपचारार्थ दाखल,

डाॅक्टरांचा होतोय वेळेवर राऊंड

जिल्हा रुग्णालयात तीन स्त्री रोग तज्ञ सध्या काम करत आहेत. त्यांच्याकडून प्रसूतीसाठी मातांच्या तीनही वाॅर्डमध्ये सातत्याने भेटी दिल्या जातात.

सिझर शस्त्रक्रिया असल्यास तशी कल्पना मातेच्या कुटुंबाला दिली जाते. यातून मग सिझर झाल्यानंतर मातेची वेळोवेळी पाच दिवस तपासणी केली जाते.

डिस्चार्ज देण्यासह इतर मार्गदर्शन करण्यासाठी महिला वैद्यकीय अधिकारी मदत करत असल्याचे दिसून आले. मातेसोबत आलेल्या महिला व पुरुषांना वैद्यकीय अधिकारी व परिचारिका यांच्याकडूनही मदत करण्यात येत असल्याचे यावेळी दिसून आले.