वडाळी प्राथमिक आरोग्य केंद्राच्या नवी इमारतीच्या उद्घाटनाला मुहूर्त सापडेना

ग्रामस्थांनी हे आरोग्य केंद्र त्वरित नागरिकांसाठी खुले करण्याची मागणी केली आहे. या इमारतीच्या पाहणीसाठी अनेक लोकप्रतिनिधी व जिल्हा स्तरावरील संबंधित अधिकाऱ्यांनी हजेरी लावली आहे. मात्र कामकाज पूर्ण होऊनही इमारत का ताब्यात देण्यात आली नाही, असा जाब कोणीच कोणाला विचारायला तयार होताना दिसून येत नाहीत.

दोन वर्षांपासून या इमारतीचे वेगात काम सुरू होते. जवळपास ९० टक्के काम झाले असून, थोडेच काम अपूर्ण असून, त्याकरिता इमारत उद्घाटनाला कोणाची प्रतीक्षा केली जात? आहे की मुहूर्त सापडत नाही असा प्रश्न उपस्थित केला जात? आहे. वडाळी गावाच्या मुख्य रस्त्याला लागून असलेल्या जुन्या प्राथमिक आरोग्य केंद्राच्या जागी तत्कालीन माजी जिल्हा परिषद उपाध्यक्ष जयपालसिंग रावल यांच्या हस्ते २४ जून २०१९ रोजी राष्ट्रीय ग्रामीण आरोग्य विभाग अंतर्गत एक कोटी ७० लाख रुपये खर्चून बांधण्यात येणाऱ्या प्राथमिक आरोग्य केंद्राच्या इमारतीचे भूमिपूजन करण्यात आले होते. तत्कालीन तालुका वैद्यकीय अधिकारी राजेंद्र पेंढारकर आणि पंचायत समिती सदस्य गिरीश जगताप तसेच बहुसंख्य मान्यवरांच्या उपस्थितीत या प्राथमिक आरोग्य केंद्राचे भूमिपूजन करण्यात आले. त्यानंतर या अवाढव्य इमारतीचे बांधकाम ‘साई कन्स्ट्रक्शन’ला देण्यात आले. मात्र या इमारतीचे बांधकाम अत्यंत संथ गतीने सुरू असून, इमारतीचे बांधकाम लवकर व्हावे व ती प्राथमिक आरोग्य केंद्राच्या ताब्यात द्यावी, अशी मागणी आहे. कारण हे आरोग्य केंद्र सध्या एका पडक्या खोलीत सुरू असून, त्याठिकाणी सुविधाचा अभाव आहे.

वडाळी गावचा विचार करता हे लोकसंख्येच्या दृष्टीने तालुक्यातील सर्वात मोठे गाव आहे. त्याचप्रमाणे परिसरातील १६ ते १७ खेड्यांचा थेट संबंध या गावाशी येतो. या आरोग्य केंद्रांतर्गत आठ उपकेंद्र असून, एक कोंढावळ येथे मंजुरीच्या प्रतीक्षेत आहे. त्याचबरोबर आरोग्य केंद्राच्या सभोवताली संरक्षक भिंतीचेसुद्धा काम करणे आवश्यक आहे. इमारत अंतर्गत खोल्या, अतिशय जीर्ण झालेल्या आहेत. त्यांचेदेखील नूतनीकरण यानिमित्त झाले पाहिजे. परंतु अद्याप ही इमारतच पूर्ण झाली नसून, खोल्यांचा प्रश्न प्रस्तावित आहे. या इमारतीचे काम लवकरात लवकर होण्याची आशा ग्रामस्थांकडून व्यक्त केली जात आहे.

वडाळी प्राथमिक आरोग्य केंद्रांतर्गत आठ उपकेंद्र आहेत. त्यामुळे यातील कर्मचारी संख्या कमी असून, याचा ताण रुग्णांच्या संख्येवर पडत आहे. या आरोग्य केंद्रात औषधनिर्माता, बाह्यरुग्ण आरोग्य सेविका, उपकेंद्र आरोग्य सेविका, शिपाई, सफाई कर्मचारी, आरोग्य सेवक आदी पदे रिक्त असून, ती तत्काळ भरण्यात यावीत. तसेच काकर्दा, तोरखेडा, फेस, जयनगर, वडाळी, कुकावल, बामखेडा आदी उपकेंद्रातीलही पदे रिक्त आहेत. तीदेखील भरण्यात यावीत व इमारतीच्या प्रश्न लवकरात लवकर मार्गी लागावा, अशी अपेक्षा परिसरातील नागरिकांकडून व्यक्त केली जात आहे.