अपघात होऊन कठड्यांकडे दुर्लक्ष

निवारे अतिक्रमणात

नंदुरबार : तालुक्यातील गावांमध्ये उभारण्यात आलेल्या प्रवासीमार्ग निवाऱ्यांमध्ये अतिक्रमण झाल्याचे दिसून येत आहे. लोकप्रतिनिधींच्या निधीतून कधीकाळी उभारलेले हे निवारे शासकीय इमारती असताना त्याठिकाणी खासगी अतिक्रमण होत आहे. याकडे संबंधितांनी लक्ष देण्याची मागणी आहे.

दुर्गम भागात बसेस वाढीकडे दुर्लक्ष

धडगाव : सातपुड्याच्या दुर्गम भागातील धडगाव आणि मोलगी परिसरात सपाटीच्या तालुक्यातून बसफेऱ्या सुरू करण्याची मागणी करण्यात आली आहे. बसेस नसल्याने या भागातून प्रवास करणाऱ्यांचे हाल होत आहेत.

ऊस वाहतुकीमुळे अपघातांची शक्यता

नंदुरबार : धुळे जिल्ह्यातील काही भागात लागवड केलेल्या उसाची वाहतूक सुरू आहे. जिल्ह्यातील कारखान्यांपर्यंत येणाऱ्या उसाची वाहतूक करणारे वाहतूकदार नियमांचा भंग करत असल्याचे चित्र सध्या दिसून येत आहे.

सेंद्रिय भाजीपाल्याची विक्री वाढली

नंदुरबार : तालुक्यातील विविध भागात पिकवला जाणारा भाजीपाला शहरातील नागरिकांची पसंती ठरत आहे. यातही रनाळे ते नंदुरबार व कोळदे ते नंदुरबार दरम्यान काही जण रस्त्यावर भाजीपाला स्टाॅल लावून त्याची विक्री करत आहेत. यामुळे विक्री वाढीस लागली असल्याचे दिसून आले आहे. शेतातील ताजा भाजीपाला मिळत असल्याने अनेक जण भाजी घेण्यासाठी या शेतांकडेही जात आहे.

कलिंगडाची आवक

नंदुरबार : तालुक्यातील विविध भागात यंदा लागवड करण्यात आलेल्या कलिंगड, टरबूज यांचे उत्पादन येण्यास प्रारंभ झाला आहे. यातून त्याची खरेदी करण्यासाठी व्यापारी थेट बांधावर पोहोचत आहेत. पहिला हंगाम असल्याने कलिंगडाचे दरही महागले असल्याचे दिसून आले आहे.

गतिरोधकांची गरज

नंदुरबार : दोंडाईचा ते नंदुरबार रस्त्यावर रनाळे गावाजवळील वटबारे फाट्यावर गतिरोधकांची मागणी आहे. भरधाव वेगात येणा-या वाहनांमुळे या मार्गावर गतिरोधकांची अपेक्षा आहे. वटबारे गावाकडून भरधाव वेगात येणाऱ्या वाहनांना अपघात होण्याची भीती असल्याने ही मागणी करण्यात आली आहे.

पंजाबातील हार्वेस्टर जिल्ह्यात दाखल

नंदुरबार : तालुक्यातील विविध भागात पेरणी करण्यात आलेल्या गहूची कापणी करण्यासाठी पंजाब राज्यातील अवजड हार्वेस्टर सध्या दाखल झाले आहेत. काही तासात या यंत्रांद्वारे गहू कापणी होत असल्याने शेतकऱ्यांचा त्यांच्याकडे ओढा अधिक असतो.

काटेरी झुडपे काढण्याची मागणी

बोरद : तळोदा तालुक्यातील विविध भागात असलेली काटेरी झुडपे काढण्याची मागणी होत आहे. प्रमुख रस्त्यांवरील काटेरी झुडपे वन्य प्राण्यांना लपण्यासाठी साधन ठरत असल्याने ही झुडपे स्वच्छ करून रस्ते मोकळे करावे, अशी अपेक्षा व्यक्त करण्यात येत आहे.