परीक्षा तर रद्द केली, परीक्षा शुल्क कधी परत करणार?

नंदुरबार : कोरोनामुळे यंदा दहावीची परीक्षा रद्द करण्यात आली आहे. परीक्षा रद्द झाल्यामुळे आता विद्यार्थ्यांना परीक्षा शुल्क परत मिळण्याची आशा लागून आहे. २६ हजार २७२ विद्यार्थ्यांचे जवळपास १० लाख ९० हजार २८८ रुपये परीक्षा शुल्क परत द्यावे लागणार आहे. यासाठी शिक्षण विभागातर्फे आदेश येताच कार्यवाही सुरू करण्यात येणार आहे.

कोरोनामुळे गेल्या वर्षी दहावीचा भूगोलचा पेपर होऊ शकला नव्हता. त्यामुळे एकूण गुणांच्या सरासरीने विद्यार्थ्यांना गुण दिले गेले होते. यावर्षी तर संपूर्ण परीक्षाच रद्द करण्यात आली आहे. त्यामुळे विद्यार्थी व पालकांमध्ये कही गम, तर कही खुशीची स्थिती आहे. विद्यार्थ्यांनी परीक्षा शुल्कपोटी प्रत्येकी ४१५ रुपये जमा केले होते. आता परीक्षाच होणार नसल्यामुळे ते शुल्क परत करून कोरोना काळात विद्यार्थ्यांना दिलासा द्यावा, अशी अपेक्षा व्यक्त होत होती. त्यानुसार आता शासनाच्या आदेशाकडे सर्वांचे लक्ष लागून आहे. आदेश येताच विद्यार्थ्यांना ते शुल्क परत केेले जाणार आहे. परंतु, प्रश्नपत्रिका व उत्तरपत्रिका छपाई झाल्यामुळे मंडळाचा खर्च झाला आहे. त्यामुळे निर्णय काय होते त्याकडे लक्ष लागून आहे.