छुप्या पद्धतीने गुटका व मद्यविक्री सुुरूच

नंदुरबार : शहरात अवैध गुटका विक्री व गावठी मद्याची विक्री छुप्या पद्धतीने होत आहे. गुजरात राज्यातून येणारा अवैध गुटका पकडल्यानंतर शहरातील अवैध गुटका विक्रीबाबत चर्चा सुरू झाली आहे. पोलिसांकडून करण्यात आलेल्या कारवाईचेही स्वागत करण्यात आले आहे. दरम्यान पोलीस प्रशासनाने कारवाईचा वेग कायम ठेवावा, अशी अपेक्षा व्यक्त करण्यात येत आहे.

निकामी बंधाऱ्यांची दुरुस्ती रखडली

नंदुरबार : जिल्हा परिषद लघुसिंचन विभागाकडून दरवर्षी निकामी ठरलेल्या बंधाऱ्यांची दुरुस्ती करून त्या-त्या भागात सिंचनाची सुविधा करण्यावर भर दिला जातो. परंतु जिल्ह्यात मात्र या उलट स्थिती असून दुरुस्ती होत नसल्याने निकामी बंधाऱ्यांची संख्या वाढत आहे.

मिनीबस सुरू झाल्याने समाधान

धडगाव : नंदुरबार ते धडगाव दरम्यान मिनीबसेस पुन्हा सुरू करण्यात आल्या आहेत. दिवसभरात तळोदा मार्गाने धावणाऱ्या बसेसमुळे प्रवाशांच्या अडचणी दूर होत आहेत. चांदसैली मार्गाने धडगावकडे जाणाऱ्या या बसेसमुळे प्रवाशांना मोठा दिलासा मिळत आहे. बसेस सुरू झाल्याने दुर्गम भागातून नंदुरबार येथे वैद्यकीय तपासणीसाठी येणारे रुग्ण, विद्यार्थी, कागदपत्रांसाठी धावपळ करणाऱ्या नागरिकांना सोयीचे झाले आहे.

नागरिकांचे हाल

धडगाव : तालुक्यातील सुरवाणी ते असली दरम्यान रस्त्याची दुरवस्था झाली आहे. जागोजागी खड्डे पडले असून या मार्गाने प्रवास करणे जिकिरीचे होत आहे. रस्त्याचे डांबरीकरण करण्याची मागणी आहे. दुर्गम भागातील नागरिकांचा वावर असलेल्या या रस्त्यावर २४ तास वाहतूक सुरू असते.

गटारी दुरुस्त करा

नंदुरबार : तालुक्यातील काकर्दे येथे गटारींची दुरुस्ती करून देण्याची मागणी आहे. याबाबत ग्रामस्थांकडून सातत्याने पाठपुरावा करण्यात येत आहे. गावातील गटारी तुटल्याने सांडपाणी रस्त्यावर येऊन रोगराई पसरण्याचा धोका निर्माण झाला आहे. पावसाळ्यापूर्वी ह्या गटारी दुरुस्तीसाठी पाठपुरावा सुरू होता.

नावली ते खोलविहीर रस्त्याची दुरवस्था

नंदुरबार : नवापूर तालुक्यातील नावली ते खोलविहीर दरम्यानचा रस्ता खराब झाल्याने प्रवाशांचे हाल होत आहेत. या मार्गाने नवापूर तालुक्यातील नागरिक हे खांडबारा व खोलघर परिसरात जातात. परंतु रस्ता खराब असल्याने त्यांना अधिक वेळ लागत आहे. रस्त्यावरची खडी पूर्णपणे उखडली असून डांबरीकरणही निघून गेल्याने चारचाकी व दुचाकी वाहनांनी प्रवास करणे अवघड होत आहे.

खड्ड्यांमुळे त्रस्त

नंदुरबार : गुजरात हद्दीवरील सावळदा ता. नंदुरबार ते प्रकाशा पुलापर्यंतचा रस्ता पूर्णपणे खड्ड्यात गेला आहे. हा रस्ता दुरुस्तीबाबत कारवाई करण्यात आलेली नाही. मार्गावरून गुजरात राज्यातून पुन्हा महाराष्ट्रात प्रवास करणाऱ्यांची संख्या मोठी असून त्यांना खड्ड्यांमुळे त्रास होत आहे.

एसटीसाठी पाठपुरावा

अक्कलकुवा : दुर्गम भागातील गाव-पाड्यांवर एसटी बसेस सुरू व्हावी अशी अपेक्षा आहे. भांग्रापाणी, जमाना, काठी, भगदरी, वडफळी या मार्गांवर बसेस वाढवण्याची मागणी आहे. बसेस नसल्याने दुर्गम भागातील नागरिक अवैध प्रवासी वाहनांचा आधार घेतात. या भागात एकच बसफेरी होत आहे.

निवडणुकांमुळे गावोगावी उत्साह

अक्कलकुवा : जिल्हा परिषद व पंचायत समितीच्या गट व गणांसाठी पोटनिवडणूक होत असल्याने सध्या खापर व अक्कलकुवा परिसरात उत्साह आहे. यातून रात्री उशिरापर्यंत बैठका घेतल्या जात असल्याचे दिसून आले आहे. यामुळे यंदाही निवडणूक रंगतदार होणार आहे.

नंदुरबार तालुक्यातही नागरिकांमध्ये चर्चा

नंदुरबार : तालुक्यातील जिल्हा परिषद गटांमध्ये पोटनिवडणूक कार्यक्रम सुरू झाला असून कोण अर्ज करणार किंवा काय होणार याबाबत चर्चा सुरू आहेत. ग्रामीण भागातील सोशल मीडियावर याबाबत अनेक चर्चा सुरू असल्याचे सध्या दिसून येत आहे.