सावखेडा येथे बीज प्रक्रियेबाबत मार्गदर्शन

या वेळी सरपंच मंजुळाबाई निंबा पवार, उपसरपंच मनेश पवार, पोलीस पाटील सोनवणे, डोंगरगावचे उपसरपंच दिलीप पाटील, सावखेडा ग्रामस्थ अर्जुन पवार, गणेश दिघे, संतोष गांगुर्डे, विष्णू पवार, गुफरान पिंजारी, काशिनाथ गागरे, संजय मराठे, सुरेश पाटील आदी शेतकरी उपस्थित होते. कृषी सहायिका बी.आर. पावरा, कृषिसेवक चौधरी, वसावे, संतोष वळवी यांनी निरोगी पिकांसाठी सोयाबीन, मका, तूर, मूग आदी पिकांची बीजप्रक्रिया व उगवण क्षमता तपासणी प्रात्याक्षिक केले. खरीप हंगामातील पेरणी करणाऱ्या शेतकऱ्यांनी बीजप्रक्रिया करूनच पेरणी करणे व बियाणे घरचे असो किंवा विकतचे उगवण क्षमता तपासूनच पेरणी करण्याबाबत जनजागृती करण्यात आली. खतांचे कार्यक्षम वापर व खत बचतीच्या उपाययोजना सांगताना जमीन निर्देशकांनुसारच शेतकऱ्यांनी खत वापरण्याचे नियोजन करावे व महात्मा गांधी ग्रामीण हमी योजनेअंतर्गत फळबाग लागवडीबाबतही मार्गदर्शन करण्यात आले. मंडळ कृषी अधिकारी आर.एम. धनगर यांनीही मार्गदर्शन केले.

महाडीबीटी पोर्टल योजना ‘अर्ज एक योजना अनेक’, प्रधानमंत्री ठिबक सिंचन योजना, मकावरील लष्करी अळी, कपाशीवरील गुलाबी शेंदुरी बोंडअळी, एकात्मिक कीडरोग व्यवस्थापन, व्हर्मी कंपोस्ट, नॅडेप कंपोस्टिंग, सेंद्रिय शेती अशा कृषी विभागाच्या योजनांबाबत मार्गदर्शन करण्यात आले. कार्यक्रमानंतर दिलीप पाटील यांच्या सीताफळ लागवड क्षेत्राची क्षेत्रीय पाहणी करण्यात आली.