कुंभार समाजाचे भविष्य अंधकारमय; मातीचे चाक यंदाही थंडावले !

गेल्या वर्षीदेखील वर्षभर घाम गाळून तयार केलेला माल घरातच पडून होता. यंदाही तो घेण्यास कोणीही ग्राहक पुढे येत नसल्यामुळे व्यवसायाला घरघर लागली आहे. यातून मार्ग कसा काढावा असा प्रश्न जिल्ह्यातील कुंभार समाजबांधवांना पडला आहे. शहादा शहरात व जिल्ह्यात कुंभार समाजाची मोठी वस्ती आहे. येथील समाजबांधव पारंपरिक माठ, रांजण, खापर, सणा-समारंभाला लागणारे दिवे, पणत्या, मातीच्या चुली, इत्यादी वस्तू मोठ्या प्रमाणावर बनवतात. उन्हाळ्याच्या पार्श्वभूमीवर येथील समाजबांधवांनी मोठ्या संख्येने माल बनवून ठेवला. मात्र या जीवघेण्या आजारामुळे सर्वत्र लॉकडाऊन, त्यामुळे ठप्प झालेले दळणवळण आणि तयार माल घरीच पडून आहे. यासाठी कर्जरूपी गुंतवलेले भांडवल वसूल होते की नाही याची चिंता या व्यावसायिक बांधवांना लागली आहे.

आखाजीवर मंदीचे सावट

कुंभार समाजबांधवांसाठी अक्षय्यतृतीया अर्थातच आखाजी हा अतिशय महत्त्वाचा सण आहे. या दिवशी वाडवडिलांचे श्राद्ध घालण्याची परंपरा खानदेशात पूर्वापार पद्धतीने चालत आलेली आहे. यासाठी मातीच्या घागरींना विशेष महत्त्व असते. लॉकडाऊनमुळे व्यवसाय ठप्प झाला असून, जीवन अंधकारमय झाले आहे, असे भावनिक उद्‌गार येथील व्यावसायिक बंधूंनी काढले आहे.

अक्षय्यतृतीया व उन्हाळ्याच्या पार्श्वभूमीवर तयार केलेल्या मातीच्या वस्तूंना मागील वर्षाप्रमाणे यावर्षीही मागणी नसल्यामुळे समाजबांधवांवर कर्जाचा डोंगर वाढत आहे. यातून सावरण्यासाठी शासनाने आर्थिक मदत करावी. शासनाने आर्थिक पॅकेज जाहीर करून मदत करावी; जेणेकरून पारंपरिक व्यवसायाला चालना मिळून कुंभार समाजाची उपासमार होणार नाही.

- हृदयेश चव्हाण, जिल्हाध्यक्ष, नंदुरबार जिल्हा कुंभार समाज संघटना