रोपवाटिका तयार केल्याचे भासवत फसवणूक केल्याप्रकरणी गुन्हा दाखल

लोकमत न्यूज नेटवर्क
नंदुरबार : दोंदवाडे ता़ शहादा येथे सामाजिक वनीकरण विभागाची रोपवाटिका तयार केल्याचे भासवून त्यापोेटी रक्कम वसूल केल्याप्रकरणी माजी सरपंचाविरोधात अखेर गुन्हा दाखल करण्यात आला़ सामाजिक वनीकरण विभागाच्या त्रिस्तरीय समितीने केलेल्या चौकशीचा अहवाल प्राप्त झाल्यानंतर ही कारवाई करण्यात आली़
दोंदवाडे येथे माजी सरपंच ज्ञानेश्वर हिंमत पाटील याने रोपवाटिकेसाठी खोटा करार करुन मालकीची जागा नसतानाही खोटा सातबारा तयार करुन शासनाची फसवणूक केल्याचा प्रकार गेल्या वर्षी जानेवारी ते मार्च २०१९ दरम्यान घडला होता़
याप्रकरणी चौकशी समिती नियुक्ती होती़ समितीने केलेल्या चौकशीत ज्ञानेश्वर पाटील याने सामाजिक वनीकरण विभागाना दिलेला सातबारा उतारा तसेच त्यावरील तलाठ्याची सही आणि शिक्का खोटा असल्याचे दिसून आले होते़ दरम्यान यातून माजी सरपंच पाटील याने शासनाकडून जमिनीवर मालकी नसताना रोपवाटिका तयार केल्याचे भासवत ३६ हजार रुपयांचे भाडे वसुल केले होते़ या प्रकाराचा चौकशी अहवाल पूर्ण झाल्यानंतर सामाजिक वनीकरणचे वनपाल भाईदास काशीराम गुजर यांनी सारंगखेडा पोलीस ठाण्यात बुधवारी दिलेल्या फिर्यादीवरुन माजी सरपंच ज्ञानेश्वर पाटील याच्याविरोधात गुन्हा दाखल करण्यात आला आहे़ तपास सहायक पोेलीस उपनिरीक्षक बागले करत आहेत़ गेल्या वर्षी दोंदवाडे ग्रामस्थांनी उपोषण केल्यानंतर हा प्रकार समोर आला होता़