लागण होण्याच्या भितीनेच कोविड केअर सेंटर्समध्ये दिसतोय शुकशुकाट

नंदुरबार : कोरोना रुग्णांवर उपचार करण्यासाठी सुरु केलेल्या कोविड सेंटर्सच्या बाहेर रुग्णांचे नातलगतही फिरकत नसल्याने या सेंटर्सवर शुकशुकाट आहे. कोरोनाची लागण होण्याची भिती असल्याने या इमारतींच्या आवारातही कोणी फिरकत नसल्याचे दिसून आले.

शहरातील जिल्हा रुग्णालय आवारात असलेले महिला रुग्णालय आणि आदिवासी विकास विभागाच्या एकलव्य रेसिडेन्शियल स्कूल अशा दोन ठिकाणी सध्या कोविड केअर सेंटर सुरु आहेत. कमी लक्षणे असलेल्या रुग्णांना एकलव्य येथे ठेवण्यात येत आहे. गेल्या काही महिन्यांपूर्वी शाळा सुरु होणार असल्याने हे सेंटर बंद करण्यात आले होते. गेल्या आठवड्यात ते पुन्हा सुरु करण्यात आले आहे. दरम्यान महिला रुग्णालयात दाखल रुग्ण बाहेर पडू नये तसे आतील भागात कोणी जावू नये यासाठी खाजगी सुरक्षा रक्षक व जिल्हा रुग्णालयात पोलीस बंदोबस्त तैनात असल्याचे दिसून आले आहे. एकलव्य स्कूलची इमारतच शहराबाहेर असल्याने या भागात आरोग्य कर्मचारीच दिसून येत आहेत. याठिकाणी सध्या नव्याने तयारी सुरु आहे. दरम्यान विमल विहार परिसरात असलेल्या तापी कोविड केअर सेंटरमध्ये केवळ ९ रुग्ण उपचार घेत असून त्यांनाही डिस्चार्ज करण्यात येणार असल्याने या इमारतीतही शुकशुकाट दिसून आला.

तरीही गेटवर सुरक्षा रक्षक दिसेनात

खामगाव रोडवर आदिवासी विकास विभागाच्या एकलव्य रेसीडेन्शियल स्कूलची इमारत आहे. याठिकाणी कोविड केअर सेंटर तयार करण्यात आले आहे. २७० बेड्सची व्यवस्था याठिकाणी करण्यात आली आहे. यापूर्वी दाखल रुग्णांनी सुविधेवर प्रश्न उपस्थित केल्यानंतर याठिकाणी चोख व्यवस्था देण्याचे नियोजन करण्यात आले आहे. आतील सुविधा ह्या चांगल्या प्रकारे सुरु झाल्या असल्या तरी सुरक्षा रक्षक मात्र दिसून आले नाही. याठिकाणाहून रुग्ण बाहेर जाणे सहज शक्य असल्याने सुरक्षेच्या दृष्टीने उपायायोजनांची गरज आहे.

पोलीस कर्मचारी असतात तैनात

जिल्हा रुग्णालयात जिल्हा शल्य चिकित्सक यांच्या कार्यालयामागे महिला रुग्णायात एकूण १०० खाटा आहेत. याठिकाणी सध्या रुग्ण ठेवण्यात आले आहेत. समोरील बाजूस नेत्रकक्षात ४० खाटांचे आयसीयू आहे. परंतू या परिसरात सुरक्षा रक्षक नियुक्त करण्याबाबत उदासिनता आहे. सहसा कोरोनाच्या भितीने कोणी तिकडे जात नसले तरीही रुग्णांचे नातेवाईक फिरत असल्याचे दिसून आले. महिला रुग्णालयातही बरेच रुग्ण बाहेरील बाजूस येत असल्याचे दिसून येत होते.